Shqipëria

Shpërdoroi detyrën, GJKKO pranon gjykim të shkurtuar për Fatos Tushen


Gjykata e Posaçme Kundër Korrupsionit dhe Krimit të Organizuar, mesditën e 19 prillit ka vendosur të pranojë kërkesën e ish-kryebashkiakut të Lushnjes, Fatos Tushe – i akuzuar për shpërdorim detyre – dhe të tëpandehurve të tjerë për gjykim të shkurtuar.

Më 8 shkurt Gjykata e Lartë nuk e pranoi rekursin e Tushes sa i takonte vendimit të Apelit të GJKKO-së.

Tushe së bashku me zyrtarë të tjerë, u arrestuan më 6 korrik me urdhër të Prokurorisë së Posaçme (SPAK). Fill pas arrestimit me vendim të Këshillit të Ministrave ai u shkarkua nga detyra.

Sakaq ai iu drejtua Gjykatës Kushtetuese për të rimarrë mandatin e të zgjedhurit vendor, por ditën e gjykimit më 21 dhjetor ai hoqi dorë dorë nga ankimimi i tij.

Që prej arrestimit të tij, Tushe ka apeluar disa herë masën “arrest me burg”, duke kërkuar masë më të butë për arsye shëndetësore.

Në kërkesën e depozituar në gjykatë, Fatos Tushe pretendonte se vuan nga sëmundje të zemrës, diabet, gurë në tëmth, si dhe është alergjik ndaj ushqimeve specifike.

Ndërkaq, Tushe është shprehur se ishte i gatshëm të paguante lirimin me kusht, në mënyrë që të dilte nga burgu.

Por të gjitha kërkesat e ish-kryebashkiakut janë hedhur poshtë.

Më 13 shtator, GJKKO ka lënë në fuqi masën e arrestit me burg për Tushen.

Hetimi ndaj tij nisi në korrik të 2020-ës, pasi u dyshua se kishte përfituar në mënyrë të paligjshme nga një tender me vlerë 24 milionë lekë, për ndërtimin e kanalit vaditës në Lushnjë.

Në pranga ra edhe nënkryetari i Bashkisë së Lushnjës, Gentian Nushi dhe drejtori i Drejtorisë së Prokurimeve/Juridike.

Sipas njoftimit zyrtar, në vitin 2020, janë evidentuar shkelje ligjore, të kryera nga dy zyrtarët e Bashkisë së Lushnjës, në vitin 2020.

Ata akuzohen për veprën penale “Shkelje të barazisë së pjesëmarrësve në tendera apo ankande publike”, kryer në bashkëpunim.

Akuzat për të arrestuarit

Fatos Tushe, me detyrë Kryetar i Bashkisë Lushnjë, akuzohet për kryerjen e veprës penale të “shpërdorimit të detyrës” në bashkëpunim.

Flamur Peqini, me detyrë drejtor i Ndërmarrjes së Pasurisë Publike pranë kësaj bashkie, akuzohet për kryerjen e veprës penale të “shpërdorimit të detyrës” në bashkëpunim, “shkeljes së barazisë së pjesëmarrësve në tendera apo ankande publike”.

Gazmend Çela, Bektash Nexha dhe Blerta Turku, punonjës pranë drejtorisë së lartpërmendur, akuzohen për kryerjen e veprës penale të “shkelje e barazisë së pjesëmarrësve në tendera apo ankande publike”.

Ibrahim Lami, administrator i kompanisë “Loti shpk” dhe Bujar Murati, administrator i kompanisë “Euro Alb shpk”, akuzohen për kryerjen e veprave penale të “falsifikim i dokumenteve”.

Tushe ka drejtuar Bashkinë e Lushnjës prej tre mandatesh. Ai ka qenë edhe deputet në Parlamentin e Shqipërisë.

Më 31 dhjetor të vitit të kaluar, Tushe, së bashku me sekretaren e tij mbetën të plagosur pas një sulmi në zyrë me lëndë plasëse.

/Albanianpost.com


Lajmet kryesore