Shkodër, gjendet një person i vrarë me armë zjarri

Një ngjarje e rëndë ka ndodhur mëngjesin e 17 majit, në Shkodër, ku një person është gjetur i vrarë me armë zjarri në bregun e liqenit, në livadhe, në lagjen Guerile.

Sipas burimeve të para bëhet me dije se personi i vdekur është 32-vjeçari, Endri Mustafa. Mustafa kishte tre ditë që ishte zhdukur.

Ai ishte vrarë me shtatë plumba. Një plumb e ka marrë në gojë dhe kokë.

Mësohet se ai ka dalë nga shtëpia mbrëmjen e 15 majit pas një mesazhi në telefon, dhe nga ai moment nuk është kthyer në shtëpi.

Mustafa nuk është një emër i panjohur për policinë. Ky shtetas rezultonte me precedent të mëparshëm kriminal.

Ai në vitin 2016 është arrestuar me akuzën “Vjedhje me armë”, “Plagosje e lehtë me dashje” dhe “Prodhim dhe mbajtje pa leje të armëve e municioneve luftarake”, së bashku me katër persona të tjerë. Ndër të arrestuarit ishte dhe Astrit Bilali.  Ky i fundi është vrarë në vitin 2019, për shkak të larjes së hesapeve mes bandave.

Ndërsa në vitin 2020, Mustafa u shpall në kërkim nga policia, pas një operacioni të quajtur “Maranaj” për fajde.

Deri më tani nuk dihet arsyeja e vrasjes së Mustafës.

Në lidhje me ngjarjen është ngritur një grup i posaçëm hetimor. Nën drejtimin e Prokurorisë së Rrethit Gjyqësor Shkodër po punohet për zbardhjen e rrethanave të ngjarjes, identifikimin dhe kapjen e autorit/ëve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.