Shkatërrohet “super-karteli” i kokainës në Dubai

Policia ka shkatërruar një “super-kartel” të madh droge që kontrollonte një të tretën e tregtisë së kokainës në Evropë.

Në pranga kanë përfunduar 49 persona në vende të ndryshme, duke përfshirë gjashtë të dyshuar kryesorë në Dubai, tha Europol të hënën.

Lajmi u bë i ditur nga agjencia franceze “AFP”.

Operacioni i madh ndërkombëtar kapi 30 tonë drogë dhe çoi në arrestime në Belgjikë, Francë, Holandë dhe Spanjë, tha në një deklaratë agjencia policore e Bashkimit Evropian.

Goditja – e cila përfshinte një “peshk jashtëzakonisht të madh” nga Holanda dhe me bazë në Dubai – kryesisht kishte në shënjestër kokainën që vinte nga Amerika e Jugut përmes porteve të Roterdam-it dhe Antwerp-en.

“Kokat e drogës, të konsideruara si objektiva me vlerë të lartë nga Europol-i, ishin bashkuar për të formuar atë që njihej si një ‘super kartel’ që kontrollonte rreth një të tretën e tregtisë së kokainës në Evropë”, tha Europol.

Sipas agjencisë evropiane, shkalla e importit të kokainës në Evropë nën kontrollin dhe komandën e të dyshuarve ishte masive dhe mbi 30 tonë drogë u sekuestruan nga forcat e rendit gjatë hetimeve.

Europol tha se Dubai kishte arrestuar dy të dyshuar “me vlerë të lartë” që janë të lidhur me Francën, dy të lidhur me Holandën dhe dy të tjerë të lidhur me Spanjën.

Dhjetë persona u arrestuan në Belgjikë, gjashtë në Francë dhe 13 në Spanjë.

14 persona të tjerë u arrestuan në vitin 2021 në Holandë si pjesë e të njëjtit operacion, tha organizata me bazë në Hagë.

Arrestimet ishin të fundit në një seri që pasoi një hakim të telefonave të sofistikuar të enkriptuar nga policia të përdorura nga rrjetet e krimit të organizuar vitin e kaluar, tha Europol.

‘Peshku jashtëzakonisht i madh’ 

Prokurorët holandezë thanë se do të kërkonin ekstradimin e të dyshuarve nga Emiratet e Bashkuara Arabe.

Një nga të dyshuarit ishte një burrë 37-vjeçar me shtetësi të dyfishtë holandeze dhe marokene, i cili u mbajt për dyshime se kishte importuar mijëra kilogramë kokainë në Holandë në vitet 2020 dhe 2021.

“Këto janë vepra të rënda penale që kanë të bëjnë me trafikun ndërkombëtar të drogës, kryesisht nga Amerika e Jugut nëpërmjet porteve të Antwerp-it dhe Roterdamit”, tha në një deklaratë shërbimi i prokurorisë publike holandeze.

Tjetri ishte një shtetas i dyfishtë holandez-boshnjak 40-vjeçar, tha ajo.

“Një nga të dyshuarit holandezë është një peshk jashtëzakonisht i madh”, tha një burim i Europol për AFP-në në kushte anonimiteti.

Të dyshuarit holandezë dyshohet se ishin të lidhur me Ridouan Taghi, i cili u arrestua në Dubai në vitin 2019 dhe tani është në gjyq në Holandë, tha burimi.

Taghi akuzohet për drejtimin e një grupi të madh të kontrabandës së kokainës me bazë në Amsterdam dhe përballet me akuza duke përfshirë vrasjen.

Guardia Civil e Spanjës tha se gjithsej 13 persona ishin arrestuar në Barcelonë, Madrid dhe Malaga më 8 nëntor pasi 698 kilogramë kokainë u gjetën në një kontejner në portin e Valencias.

Kreu i operacionit të kontrabandës, një shtetas britanik, iku në Dubai pas një tentative arrestimi në Spanjë dhe po vazhdonte të drejtonte operacionet nga atje, thuhet në një deklaratë.

Kokaina u importua nga Panamaja në Amerikën Qendrore dhe furnizuesi i tij, një panamez, jetonte gjithashtu në Dubai, tha njoftimi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.