Shefi i OSBE-së: Kosova dhe Serbia të zbatojnë marrëveshjet për të shmangur çdo tension të ri – jemi të gatshëm t’i mbështesim

Shefi i Misionit të Organizatës për Siguri dhe Bashkëpunim në Evropë (OSBE), Michael Davenport, deklaroi se u takon liderëve politikë të Kosovës dhe Serbisë që të gjejnë një zgjidhje për të de-përshkallëzuar situatën.

Sipas tij kjo është edhe më e rëndësishme pas sulmit të armatosur ndaj Policisë së Kosovës në Banjë më 24 shtator.

“Sulmi i armatosur ndaj policisë së Kosovës në Banjë ishte një incident i rëndë”.

“Është e rëndësishme të qetësohet situata tani. Ne pamë që KFOR-i e rriti numrin e ushtarëve në Veri pas këtyre incidenteve. Besoj se tani i takon liderëve politikë që të gjejnë një mënyrë konkrete për të de-përshkallëzuar seriozisht të gjithë situatën, për të ecur përpara, dhe ka të bëjë me zbatimin e të gjitha marrëveshjeve në dialogun ndërmjet Kosovës dhe Serbisë. Për të shmangur çdo tension të ri”.

Ai theksoi se krijimi i Asociacionit të Komunave me Shumicë Serbe ishte rezultat i marrëveshjes së parë të vitit 2013.

“Ne si mision i OSBE-së jemi të gatshëm të mbështesim edhe zbatimin e kësaj marrëveshje, nëse do të ketë një statut që do të jetë në përputhje me obligimet në kuadër të dialogut dhe që i plotëson të gjitha nevojat”, deklaroi ai për Radio Televizionin e Kosovës (RTK).

Nga këndvështrimi i tij aktualisht e rëndësishme është që vetëm të shohin progres.

“Është e rëndësishme që të shohim progres në zbatimin e të gjitha marrëveshjeve të tjera, dhe të ecim në drejtim të një marrëveshjeje gjithëpërfshirëse ligjërisht obligative ndërmjet Beogradit dhe Prishtinës”.

Ndërsa sa i përket qëndrimit të misionit të OSBE-së për moszbatimin e vendimit të Gjykatës Kushtetuese të Kosovës për kthimin e tokës në manastirin Deçanit ai tha se është i qartë.

“Bëjmë thirrje që të zbatohet vendimi i Gjykatës Kushtetuese të Kosovës nga viti 2016. Ky vendim është marrë shtatë vite më parë dhe është e papranueshme që nuk zbatohet. Bëhet fjalë për pronën e manastirit prej 24 hektarësh. U bëjmë thirrje organeve kompetente që të kryejnë të gjitha obligimet e tyre për ta regjistruar atë tokë në kadastër, kjo është një çështje e qartë, është në lojë sundimi i ligjit”.

Udhëheqësit e vendeve më të fuqishme të BE-së – Gjermania, Franca dhe Italia – nëpërmjet një deklarate të përbashkët, kishin kërkuar nga Qeveria e Kosovës të nisë urgjentisht procedurën për themelimin e Asociacionit të Komunave me shumicë serbe, ndërsa nga Qeveria e Serbisë kanë kërkuar njohjen de facto të shtetësinë e Kosovës.

BE-ja paraprakisht ka prezantuar një “plan të ri” për zbatimin e Marrëveshjes Bazë (Bruksel, 27 shkurt) dhe Aneksit të Implementimit (Ohër, 18 mars) dhe një “propozim modern evropian” për statutin e Asociacionit të Komunave me shumicë serbe, ndërsa Kosova dhe Serbia kanë pranuar që dokumenti i ri të jetë kornizë për negociatat e mëtejshme në kuadër të dialogut.

Kosova dhe Serbia janë pjesë e dialogut të ndërmjetësuar nga BE-ja, për normalizim të raporteve, prej vitit 2011.

Palët kanë nënshkruar një mori marrëveshjesh, por jo të gjitha janë zbatuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.