Shefi i OKB-së i përgjigjet Izraelit: “Unë thashë se ankesat palestineze nuk mund të justifikojnë sulmin e Hamasit”

Sekretari i Përgjithshëm i OKB-së, Antonio Guterres reagoi të mërkurën e 25 tetorit ndaj akuzave izraelite se ai justifikoi sulmin terrorist të Hamasit kur i tha Këshillit të Sigurimit se sulmi i 7 tetorit “nuk ndodhi në vakum”.

“Jam i tronditur nga keqinterpretimet e disa deklaratave të mia dje në Këshillin e Sigurimit – sikur po justifikoja aktet e terrorit nga Hamasi. Kjo është e rreme. Ishte e kundërta”, thotë Guterres në një deklaratë.

“Në fillim të ndërhyrjes sime dje, unë e deklarova qartë – dhe citoj: ‘Kam dënuar pa mëdyshje aktet e tmerrshme dhe të paprecedentë të terrorit të 7 tetorit nga Hamasi në Izrael. Asgjë nuk mund të justifikojë vrasjen, plagosjen dhe rrëmbimin e qëllimshëm të civilëve – apo lëshimin e raketave kundër objektivave civile”.

Ai shtoi se në të vërtetë, foli për ankesat e popullit palestinez.

“Duke e bërë këtë, gjithashtu e deklarova qartë dhe citoj: ‘Por ankesat e popullit palestinez nuk mund të justifikojnë sulmet e tmerrshme të Hamasit’”.

“Dhe më pas vazhdova me ndërhyrjen time duke iu referuar të gjitha qëndrimeve të mia për të gjitha aspektet e krizës në Lindjen e Mesme”, ravijëzoi ai.

Sipas Guterres-it, ishte e nevojshme të rregullohej rekordi – “veçanërisht nga respekti për viktimat dhe familjet e tyre”, përfundon ai.

Diplomacia izraelite përplaset me shefin e OKB-së, kërkohet dorëheqja e tij

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.