Shefi i Apple-it do të ketë shkurtim page me mbi 40% këtë vit

Kompania Apple po shkurton kompensimin e shefit ekzekutiv Tim Cook me më shumë se 40 për qind në 49 milionë dollarë në vitin 2023.

Një lëvizje kjo, që ka ardhur pas kritikave nga aksionarët.

Vitin e kaluar, aksionet e prodhuesit të iPhone-it ranë ndjeshëm përballë çështjeve të zinxhirit të furnizimit dhe një ngadalësimi ekonomik global.

Komiteti i kompensimit i Apple i dha atij një “kompensim të synuar” total prej 49 milion dollarë për vitin 2023.

“Komiteti i Kompensimit balancoi reagimet e aksionarëve, performancën e jashtëzakonshme të Apple-it dhe një rekomandim nga Cook për të rregulluar kompensimin e tij në dritën e reagimeve të marra”, ka deklaruar kompania.

Sakaq, veprimi do të shohë pagën bazë vjetore të Cook-ut të pandryshuar në tre milionë dollarë, si dhe një bonus deri në gjashtë milionë dollarë.

Dallimi më i madh në paketën e tij të pagës është se si do t’i jepen aksionet në firmë.

Në vitin 2022, kompania i dha atij 75 milionë dollarë aksione, gjysma e të cilave bazoheshin në performancën e mirë të Apple-it në tregun e aksioneve.

Për këtë vit objektivi i tij i çmimit të aksioneve është ulur në 40 milionë dollarë, me tre të katërtat e kësaj të varur nga performanca e aksioneve.

Objektivi për kompensimin e Cook-ut për vitin 2022 ishte 84 milionë dollarë, megjithëse paga totale e tij aktuale për vitin e kaluar ishte 99.4 milionë dollarë.

Shifra përfshinte 630 mijë e 600 dollarë në kostot e sigurisë personale dhe 712 mijë e 500 dollarë për përdorimin e tij të një avioni privat.

Vitin e kaluar, aksionerët e Apple-it u nxitën nga një grup udhëheqës këshillues investitorësh që të votonin kundër paketës së pagave të Cook.

Shërbimet Institucionale të Aksionarëve (ISS), në një letër drejtuar investitorëve kanë bërë me dije se ka “shqetësime të rëndësishme mbi dizajnin dhe madhësinë e paketës”.

Sipas tyre, paga e Cook-ut ishte 1,447 herë më shumë se paga e një punonjësi mesatar të Apple-it.

Cook u bë shefi ekzekutiv i kompanisë në gusht 2011, vetëm disa javë para vdekjes së bashkëthemeluesit Steve Jobs.

Apple-i, nën udhëheqjen e tij, u bë kompania e parë që arriti një vlerësim të tregut të aksioneve prej tre trilionë dollarësh përpara se të binte në rreth 2.1 trilionë dollarë gjatë një viti të trazuar për industrinë e teknologjisë.

Në Kinë, kufizimet ndaj COVID-it në fabrika, vonesat e zinxhirit të furnizimit dhe një ngadalësim ekonomik global kanë ndihmuar në uljen e çmimit të aksioneve me më shumë se 20 për qind gjatë vitit të kaluar.

Marrë nga “BBC”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.