SHBA-të nuk kërkojnë falje për prioritizimin e vendeve amerikane të punës, i thotë BE-së Podesta

Shtetet e Bashkuara të Amerikës nuk do të kërkojnë “falje” për prioritizimin e vendeve amerikane të punës në përpjekje për të udhëhequr konkursin global të energjisë së pastër.

Kështu ka thënë zyrtari i Shtëpisë së Bardhë përgjegjës për financimin e gjelbër prej 369 miliardë dollarësh, John Podesta.

Këshilltari i lartë i presidentit amerikan Joe Biden për energjinë e pastër, ka kundërshtuar kritikat se Akti i Reduktimit të Inflacionit të SHBA-ve do të devijonte investimet dhe do të minonte ekonominë e BE-së.

“Ne nuk kërkojmë falje për faktin se dollarët e taksapaguesve amerikanë duhet të shkojnë për investimet amerikane dhe punët amerikane”, ka përsëritur Podesta.

Po ashtu ai i ka drejtuar thirrje Evropës të marrë përgjegjësinë për zhvillimin e sektorit të saj të energjisë së pastër.

“Shpresojmë që baza industriale evropiane të ketë sukses, por i takon Evropës të bëjë një pjesë të punës. Ne nuk do ta bëjmë të gjithë këtë për ta”, ka thënë ai.

Më shumë se 90 miliardë dollarë investime të gjelbra janë derdhur në SHBA që nga miratimi i IRA-s vitin e kaluar, i cili përfshin kredite tatimore, grante dhe kredi me vlerë 369 miliardë dollarë për të rritur energjinë e rinovueshme dhe për të ulur emetimet.

Por politikanët e BE-së kanë frikë se shkalla e subvencioneve mund të minojë përpjekjet e vetë bllokut për të siguruar investime të gjelbra, me presidentin francez Emmanuel Macron që ka paralajmëruar se IRA mund të “copëzojë Perëndimin”.

IRA, e cila kërkon të zvogëlojë emetimet në gjysmën e niveleve të tyre të vitit 2005 deri në vitin 2030, ofron kredi tatimore për grupet që marrin pjesë dhe materiale nga vendet me të cilat SHBA-të kanë një marrëveshje të tregtisë së lirë.

Çka përjashton BE-në dhe Japoninë, të cilave u mungojnë marrëveshje të tilla me SHBA-të.

Duke hedhur poshtë pretendimet për rivalitet me Evropën si “të zbrazëta” për shkak të përpjekjeve të Biden-it për të rindërtuar aleancat dhe për të mbështetur Ukrainën, Podesta ka theksuar se më shumë inovacione dhe investime të energjisë së pastër në SHBA do të ulnin kostot dhe do të hapnin mundësi diku tjetër.

Veterani i politikës klimatike, i cili u emërua nga Biden-i në shtator, citoi një parashikim të Credit Suisse se deri në 1.7 trilion dollarë investime gjatë 10 viteve të ardhshme mund të ulin çmimin e energjisë së pastër me rreth 25 për qind.

Kreditë tatimore të IRA-s janë projektuar pjesërisht për të inkurajuar një ringjallje të zinxhirëve të furnizimit dhe prodhimit vendas.

Janë një përpjekje për të riindustrializuar rripin e ndryshkur të vendit dhe për të rifituar vendet e punës që kishin humbur në Azi.

“SHBA-të shkuan qartësisht shumë larg duke mos i kushtuar vëmendje të mjaftueshme bazës së tyre industriale”, ka thënë Podesta.

Gjithashtu ka shtuar se mbështetja në teknologjinë e pastër kineze ka krijuar “dobësi” për SHBA-të dhe aleatët që administrata Biden tani po përpiqet ta rregullojë.

“Ne kemi parë në luftën në Ukrainë, me varësinë e Evropës nga karburantet fosile nga Rusia, çfarë mund të ndodhë nëse një vend vendos të përdorë fuqinë e tij mbi tregun si një armë”, ka thënë Podesta.

Dhe se “ne po përpiqemi ta ndryshojmë atë dinamikë”.

Marrë nga “Financial Times”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.