SHBA-të kërkojnë de-eskalim dhe lirimin e tre policëve të rrëmbyer

Departamenti i Shtetit i SHBA-ve bëri thirrje të enjten se Kosova dhe Serbia duhet të ndërmarrin hapa të menjëhershme për të de-përshkallëzuar tensionet.

Thirrja e diplomacisë amerikane përfshin gjithashtu lirimin pa kushte të tre policëve të Kosovës të rrëmbyer nga Serbia.

Lajmi u bë i ditur gjatë konferencës për mediat të zëdhënësit të Departamentit të Shtetit, Matthew Miller.

“Ne besojmë se si Kosova dhe Serbia duhet të marrin masa për të çtensionuar situatën dhe kjo përfshin lirimin pa kushte të tre oficerëve të policisë së Kosovës që u ndaluan së fundmi”, u tha gazetarëve zyrtari amerikan.

Rrëmbimi i policëve të mërkurën mbrëma është i fundit në një sërë zhvillimesh që kanë ngritur tensionet mes Kosovës dhe Serbisë.

Ndërtimi i situatës

Në vazhdën e tensioneve të krijuara në veri të Kosovës, që nga 26 maji, kur serbët lokalë kundërshtuan në mënyrë të dhunshme që kryetarët e zgjedhur në zgjedhjet e 23 prillit të futeshin në zyrat e tyre, pasditen e së mërkurës, u rrëmbyen tre policë të Kosovës nga Serbia.

Për rrëmbimin e policëve të Kosovës, Policia e Kosovës, kryeministri Albin Kurti, ministri i Punëve të Brendshme Xhelal Sveçla, thanë se ka ndodhur brenda territorit të Republikës së Kosovës, për dallim nga pretendimi i Serbisë që deklaruan se një gjë e tillë ka ndodhur brenda territorit të Serbisë.

Fillimisht lajmin e konfirmoi Policia e Kosovës përmes një komunikate për media.

“Në thellësi të territorit të Republikës së Kosovës, në zonën kufitare në veri të vendit dyshohet se janë kidnapuar tre zyrtarë kufitar patrullues”, njoftoi policia e Kosovës.

Sipas njoftimit, “njësia policore patrulluese e kufirit ka qenë me detyre në pikë statike në vendin e quajtur Tresave/Bare, thellë brenda në territorin e Republikës së Kosovës, për të parandaluar shfrytëzimin e rrugëve ilegale, të cilat shfrytëzoheshin nga grupet kriminale për kalim ilegal dhe kontrabandë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.