SHBA-ja “thellësisht e zhgënjyer” nga “veprimet e njëanshme” që minojnë reputacionin ndërkombëtar të Kosovës

Ambasada e Shteteve të Bashkuara të Amerikës (SHBA) në Prishtinë deklaroi se është e zhgënjyer nga Qeveria e Kosovës për mbylljen e degëve të Postës së Serbisë në veri të vendit, duke vlerësuar ndër të tjera se “veprimet e pakoordinuara” mund t’i “përshkallëzojnë tensionet” ekzistuese.

“Qeveria e SHBA-së është thellësisht e zhgënjyer nga veprimet e njëanshme dhe të pakoordinuara të ndërmarra nga Qeveria e Kosovës ndaj degëve të postave serbe në veri të Kosovës”, ka thënë ambasada amerikane në një deklaratë për shtyp pas mbylljes së nëntë degëve postare serbe.

SHBA-ja i bëri thirrje Kosovës që t’i kthehet angazhimit konstruktiv në procesin e dialogut për normalizimin e marrëdhënieve midis Kosovës dhe Serbisë nën ndërmjetësimin e Bashkimit Evropian (BE). E veprimi i fundit i autoriteteve kosovare, në bazë të deklaratës së ambasadës, minon perceptimet amerikane dhe reputacionin ndërkombëtar të Kosovës.

“Veprimet e pakoordinuara të Kosovës i vënë qytetarët e Kosovës dhe ushtarët e KFOR-it në rrezik më të madh, përshkallëzojnë në mënyrë të panevojshme tensionet rajonale dhe minojnë reputacionin e Kosovës si një partner i besueshëm ndërkombëtar”, ka thënë ambasada amerikane.

Autorietet e Kosovës kanë mbyllur nëntë objekte të Postës së Serbisë në veri të territorit kosovar, të cilat vepronin ilegalisht në katër komunat veriore – Mitrovicë e Veriut, Leposaviq, Zveçan dhe Zubin Potok – ndërsa edhe BE-ja i ka bërë thirrje ekzekutivit kosovar që të rishqyrtojë vendimin.

“BE-ja e konsideron mbylljen e nëntë degëve të Postës së Serbisë në veri të Kosovës si veprim të njëanshëm dhe të pakoordinuar, që shkel marrëveshjet e arritura në dialogun e lehtësuar nga BE-ja”, theksoi zëdhënësi i BE-së për Politikë të Jashtme dhe Siguri, Peter Stano, në një deklaratë për shtyp.

Gjithashtu, zëdhënësi evropian njoftoi se BE-ja është e gatshme ta përfshijë çështjen e operimit të postës serbe në agjendën e takimit të ardhshëm në kuadër të dialogut për normalizimin e marrëdhënieve: “BE pret që palët të zhvillojnë ide konstruktive që mund të shërbejnë si bazë për zgjidhje”.

“Veprimet e njëanshme dhe të pakoordinuara nuk ofrojnë zgjidhje për këtë apo ndonjë çështje tjetër që i përket procesit të normalizimit ndërmjet Kosovës dhe Serbisë. Mbyllja e shërbimeve postare ekzistuese, pa ndonjë marrëveshje të re të rënë dakord paraprakisht, do të ndikojë negativisht në jetën e përditshme dhe kushtet e jetesës së komunitetit serb”, ka shtuar ai.

Përkundër se situata e përgjithshme në pjesën veriore të Kosovës të banuar me shumicë serbe është më e qetë pas ngjarjeve të vitit të kaluar, akoma perceptohet tensioni – tension për shkak të numrit të madh të çështjeve të pazgjidhura në bisedimet për normalizimin e marrëdhënieve Kosovë-Serbi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.