SHBA-ja dhe BE-ja druhen se “veprimet e pakoordinuara” rrezikojnë t’i përshkallëzojnë tensionet në Kosovë

Bashkimi Evropian (BE) dhe Shtetet e Bashkuara (SHBA) u shprehën të shqetësuara për mbylljen nga Policia e Kosovës të nëntë degëve të Postës së Serbisë në pjesën veriore të Kosovës, duke vlerësuar ndër të tjera se “veprimet e pakoordinuara” dhe “veprimet e njëanshme” rrezikojnë t’i përshkallëzojnë tensionet ekzistuese ndërmjet Kosovës e Serbisë.

“BE-ja e konsideron mbylljen e nëntë degëve të Postës së Serbisë në veri të Kosovës si veprim të njëanshëm dhe të pakoordinuar, që shkel marrëveshjet e arritura në dialogun e lehtësuar nga BE-ja”, ka theksuar zëdhënësi i BE-së për Politikë të Jashtme dhe Siguri, Peter Stano, në një deklaratë për shtyp.

Gjithashtu, zëdhënësi evropian ka njoftuar se BE-ja është gati ta përfshijë çështjen e operimit të postës serbe në agjendën e takimit të ardhshëm në kuadër të dialogut për normalizimin e marrëdhënieve: “BE pret që palët të zhvillojnë ide konstruktive që mund të shërbejnë si bazë për zgjidhje”.

“Veprimet e njëanshme dhe të pakoordinuara nuk ofrojnë zgjidhje për këtë apo ndonjë çështje tjetër që i përket procesit të normalizimit ndërmjet Kosovës dhe Serbisë. Mbyllja e shërbimeve postare ekzistuese, pa ndonjë marrëveshje të re të rënë dakord paraprakisht, do të ndikojë negativisht në jetën e përditshme dhe kushtet e jetesës së komunitetit serb”, ka shtuar ai.

Nga ana tjetër, qeveria amerikane i ka bërë thirrje Kosovës që t’i kthehet angazhimit konstruktiv në procesin e dialogut për normalizimin e marrëdhënieve Prishtinë-Beograd nën ndërmjetësimin e BE-së. E veprimi i fundit i autoriteteve kosovare, në bazë të deklaratës, rrezikon ushtarët e misionit të NATO-s (KFOR) dhe reputacionin ndërkombëtar të Kosovës.

“Qeveria e SHBA-së është thellësisht e zhgënjyer nga veprimet e njëanshme dhe të pakoordinuara të ndërmarra nga Qeveria e Kosovës ndaj degëve të postave serbe në veri të Kosovës”, ka thënë ambasada amerikane në një deklaratë për shtyp pas mbylljes së nëntë degëve postare serbe.

“Veprimet e pakoordinuara të Kosovës i vënë qytetarët e Kosovës dhe ushtarët e KFOR-it në rrezik më të madh, përshkallëzojnë në mënyrë të panevojshme tensionet rajonale dhe minojnë reputacionin e Kosovës si një partner i besueshëm ndërkombëtar”, ka shtuar ambasada amerikane.

Zëvendësdrejtori i Policisë së Kosovës për rajonin e veriut, Veton Elshani, ka theksuar se aksioni ka nisur pas informatës së pranuar nga Autoriteti Rregullativ i Komunikimeve Elektronike dhe Postare (ARKEP) se në territorin e Kosovës janë duke operuar në mënyrë ilegale operatorë ekonomikë që nuk janë të regjistruar në Agjencinë e Regjistrimit të Bizneseve (ARBK).

“Pas një shkrese/informate të pranuar nga ARKEP se në territorin e Kosovës operojnë operatorë ekonomikë pa licencë, njësitet policore kanë shkuar për verifikimin e këtij informacioni. Informacioni ka rezultuar të jetë i saktë… Janë mbyllur gjithsej 9 objekte: tri në Mitrovicë të Veriut, tri në Leposaviq, dy në Zveçan dhe një në Zubin Potok”, ka njoftuar zyrtari policor.

Ndryshe, autoritetet kosovare kanë potencuar se çështja e operimit të Postës së Serbisë në Kosovë është tentuar të zgjidhet në kuadër të dialogut për normalizimin e marrëdhënieve Kosovë-Serbisë “në një fazë të mëvonshme”, por për shkak të refuzimit të Serbisë, kjo çështje s’është adresuar asnjëherë.

“Pra, meqenëse është lënë që kjo çështje të diskutohet në një fazë të mëvonshme, deri më sot nuk ka pasur iniciativë për fillimin e bisedimeve për zgjidhjen e kësaj çështje, apo edhe ndonjë veprim konkret për ndalimin e operimit të postës serbe. Për më tepër, ky subjekt nuk figuron në ARBK, pra rrjedhimisht nuk posedon certifikatë biznesi dhe numër fiskal”.

Përkundër se situata e përgjithshme në pjesën veriore të Kosovës të banuar me shumicë serbe është më e qetë pas ngjarjeve të vitit të kaluar, akoma perceptohet tensioni – tension për shkak të numrit të madh të çështjeve të pazgjidhura në bisedimet për normalizimin e marrëdhënieve Kosovë-Serbi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.