Shanghai përgatitet të lehtësojë kufizimet e COVID-it, teksa fabrikat rihapen

Shanghai po përgatitet të lehtësojë bllokimin për 24 milionë banorët e qytetit me shpresën se infektimet me COVID-19 do të kufizohen në objektet e karantinës.

Sakaq, fabrikat po kthehen në prodhim me sisteme të mbyllura.

Që prej fillimit, Shanghai vazhdon të raportojë dhjetëra mijëra raste në ditë, me shumicën në mesin e njerëzve në karantinë ose izolim.

Autoritetet, nga ana tjetër, kanë vendosur një objektiv për të arritur “zero-COVID në nivel komuniteti” deri të mërkurën.

Aktualisht, të gjitha rastet pozitive duhet të izolohen, kryesisht në magazina masive të stilit të konvikteve, ose në spitale nëse kërkohet trajtim.

Niveli zero do të jetë arritur pasi të mos ketë përhapje të mëtejshme në mesin e popullatës lokale jashtë ambienteve të karantinës dhe izolimit.

Arritja e një objektivi të tillë ka çuar në lehtësime të kufizimeve në qytete të tjera gjatë shpërthimeve të fundit.

Kina mbetet e përkushtuar ndaj politikës zero-COVID, pavarësisht përhapjes së llojit shumë infektiv Omicron në të gjithë vendin.

Mbi 340 mijë raste janë raportuar që nga fillimi i shpërthimit të Shanghai-t në mars. Këtë javë, zyrtarët e qytetit raportuan vdekjet e para që i atribuohen zyrtarisht shpërthimit.

Mungesa e dukshme e vdekjeve të raportuara nga COVID-19 është përballur me skepticizëm nga ekspertët, veçanërisht kur krahasohet me vendet e tjera.

Virologu Jin Dong-yan ka thënë se autoritetet shëndetësore kineze zakonisht nuk i numërojnë vdekjet nga sëmundjet infektive nëse kanë kushte themelore.

“Ata thjesht po bëjnë atë që kanë bërë vitet e kaluar”, ka treguar ai, duke shtuar se mund “vetëm të hamendësonte” pse autoritetet kanë vendosur të shpallin 10 vdekjet e kësaj jave.

“Ata mund të përpiqen t’u thonë njerëzve se ka vdekje”, ka thënë ai.

Jin ka zbuluar, po ashtu, se zyrtarët po tregojnë shkallën e vdekjeve në Hong Kong, ku janë regjistruar pothuajse nëntë mijë vdekje në muajt e fundit, si një paralajmërim për të mos braktisur politikat zero-COVID.

Në Shanghai, numri i ulët zyrtar i vdekjeve ka çuar në dyshime për narrativën zyrtare, pasi njerëzit pretendojnë se vdekjet e anëtarëve të familjes në moshë të thyer nuk pranohen.

Dhe se raportet e mediave censurohen.

Bllokimet kanë shkaktuar ndërprerje të mëdha në jetën e përditshme dhe dështimet me furnizimin me ushqim dhe sende të tjera thelbësore kanë shkaktuar zemërim.

Në të gjithë Shanghai-n, bizneset dhe fabrikat janë mbyllur ose kufizuar për më shumë se tri javë, me ndikime të mëdha në zinxhirët e prodhimit dhe furnizimit.

Kurse kompanitë e mëdha janë ndër 666 firmat, të cilave u është thënë se mund të rifillojnë prodhimin këtë javë.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.