Shala akuzon ministrin Murati se ka ndarë “heshturazi” mbi 757 mijë euro për pagat në AKP

Deputeti i Partisë Demokratike të Kosovës, Ferat Shala, ka drejtuar akuza ndaj ministrit të Financave, Hekuran Murati, që me një vendim të veçantë ka ndarë mbi 757 mijë euro për Agjencinë Kosovare të Privatizimit (AKP).

Shala, konsideron se këto mjete janë ndarë për të mbuluar vendimin e kontestuar për zvogëlimin e pagave të punëtorëve të nxjerrë nga bordi i AKP-së.

“Ministri Hekuran Murati me vendim të veçantë i ndanë AKP-së 757.802 euro për paga dhe meditje, për muajt Nëntor-Dhjetor 2022. Në vitin kur të gjithë ne pritnim shuarjen e AKP-së, Qeveria dhe bordi i AKP-së kishin nxjerrur rregullore të re dhe kishin miratuar vendimin për uljen e pagave”, ka shkruar Shala në rrjetin social ‘Facebook’.

“E vërteta del që AKP gjatë tërë vitit 2022 kanë realizuar pagat e njëjta, pa i zbritur ato fare”.

Deputeti nga PDK-ja, shtoi se për këtë kishte një dakordim të heshtur në mes të AKP-së dhe Muratit.

“Si rezultat i lojërave propagandistike, për dy muajt e fundit, heshturazi, AKP-ja dhe Hekuran Murati ishin dakorduar që ky i fundit të ndajë edhe 757.802 euro, për të mbuluar vendimin e kontestuar për zvogëlimin e pagave të punëtorëve i nxjerrë nga Bordi i AKP-së”.

“Bordi i AKP-së po vazhdon shitjen e aseteve nacionale, me të njëjtën metodologji, me të njëjtën praktikë, pa ndryshuar asgjë nga praktikat e kaluara”.

Kryeministri i Kosovës, Albin Kurti, ka qenë shumë i zëshëm për sa i përket çështjes që kishte të bënte me privatizimin dhe tjetërsimin e ndërmarrjeve shoqërore nga AKP.

Ai madje, gjatë fushatë zgjedhore, kishte thënë se synon të shuajë aktivitetin e AKP-së duke shpalosur kështu planin e tij për krijimin e Fondit Sovran, i cili do të menaxhonte këto asete.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.