Kosova

Serwer: BeH duhet të jetë gati për luftë, Vuçiç dhe Dodik mund të tentojnë një sulm si në Banjë


Profesori amerikan dhe njohësi i çështjeve të Ballkanit Perëndimor, Daniel Server, ka thënë se presidenti i Serbisë, Aleksandër Vuçiç dhe ai ultra-nacionalist i Republikës Srpska – entiteti serb në Bosnje e Hercegovinë – Millorad Dodik, mund të organizojnë një sulm terrorist në BeH siç ndodhi në Banjë të Zveçanit gjatë vitit të kaluar.

“Ne pamë se çfarë u provua në Banjë, në Kosovë, vitin e kaluar. Ishte një provokim për të nxitur reagim, i cili do t’i lejonte më tej Serbisë ose Republika Srpskas të ndërhynte, lloji i operacionit që rusët kanë kryer tashmë në Krime. Vetëm kur Dodik dhe Vuçiç të jenë të vetëdijshëm se do të ketë një përgjigje të shpejtë ushtarake, atëherë mund të jemi të sigurt se ata nuk do të tentojnë një aksion të ngjashëm siç e pamë në Banjë”, tha Serwer në një konferencë në Sarajevë.

Profesori amerikan thotë se BeH duhet të jetë gati për “luftë”, derisa ka shtuar se Dodik dhe Vuçiç kanë treguar dhe shpalosur qartë qëllimet e tyre, meqë po tentojnë ta krijojnë një “botë serbe” që të heqin Republikën Serbe nga institucionet e BeH-së.

Gjatë fjalimit të tij, Serwer foli edhe për Marrëveshjen e Paqes në Bosnjë dhe Hercegovinë, e njohur si Marrëveshja e Dejtonit.

“Është e vërtetë që Marrëveshja e Dejtonit ngriu partitë që e bënë luftën duke futur në Kushtetutë ndarje etnike mes boshnjakëve, serbëve dhe kroatëve, të paktën në nivel politik. Unë nuk i shoh këto ndarje në ndërveprimet e përditshme të qytetarëve, por në nivelin politik këto ndarje janë ngrirë. Çdo grup ka të drejtën e vetos për pothuajse gjithçka që vendoset në nivel shtetëror dhe në Federatën e Bosnjës dhe Hercegovinës”, shtoi ai.

Po ashtu, Serwer shprehu mirënjohjen e tij për mikpritjen dhe vlerësoi Sarajevën duke theksuar se është një nga qytetet më të bukura në botë.

“Shumëçka ka ndryshuar që kur erdha në vitin 1994. Dua t’i kujtoj të gjithëve se si dukej Sarajeva. Atëherë rrugët ishin bosh, pa makinat dhe njerëzit e qyteti ishte i izoluar dhe i ndarë nga periferia”, përfundoi ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore