![](https://albanianpost.com/wp-content/uploads/2024/05/Kurti-3.jpg)
Kryeministri i Kosovës, Albin Kurti, të enjten gjatë një fjalimi në Konferencën e Mbrojtjes në Londër, ka potencuar se armatimi me intensitet të lartë i Serbisë tregon që ajo po synon “eskalimin e situatës”.
Ai gjatë konferencës ka nënvizuar edhe kërcënimin e Rusisë dhe Serbisë në rajonin e Ballkanit Perëndimor.
“Ndërsa Republika jonë bashkëpunon në çdo sferë me partnerët e saj, si SHBA, Mbretëria e Bashkuar dhe BE. Serbia intensifikon bashkëpunimin e saj me Rusinë, Kinën dhe Iranin”, citohet të ketë thënë ai.
Demokracia, sipas Kurtit, ka nevojë për siguri në mënyrë që të lulëzojë.
“Sipas një studimi të kryer nga Instituti Ndërkombëtar Republikan, 87 për qind e Kosovës mbështesin politikën pro BE-së dhe Pro-Perëndimit. Kjo është përqindja më e lartë e çdo vendi të Ballkanit Perëndimor”, ka shtuar ai.
Kurti, të enjten, po qëndron në Mbretërinë e Bashkuar.
Kurti pritet të zhvillojë një takim bilateral me Sekretarin e Punëve të Jashtme të Mbretërisë së Bashkuar, David Cameron.
“Gjatë qëndrimit në Mbretërinë e Bashkuar, Kurti do të zhvillojë takime edhe në Parlamentin britanik, si dhe do të ketë një bashkëbisedim me Drejtuesen Ekzekutive të Institutit ODI (Overseas Development Institute), Sara Pantuliano, për 25-vjetorin e përfundimit të luftës dhe çlirimit të Kosovës”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com