Serbia, e vetmja në Evropë me raketa kineze

Një sistem i sofistikuar raketsh kundërajrore kineze ateruan në Beograd të dielen, në një operacion të mbështjellë me fshehtësi, ndërsa Perëndimi ka frikë se akumulimi i armëve në Ballkan gjatë luftës në Ukrainë mund të kërcënojë paqen e brishtë në rajon, raportoi Associated Press.

Mediat dhe ekspertët ushtarakë thanë të dielën se gjashtë avionë transporti të Forcave të Armatosura Kineze u ulën në aeroportin civil të Beogradit herët të shtunën, duke i dorëzuar ushtrisë serbe sistemin tokë-ajër HQ-22.

Avionët transportues kinezë Y-20 me shenja ushtarake janë fotografuar në aeroportin Nikola Tesla.

Ministria e Mbrojtjes e Serbisë ende nuk i është përgjigjur pyetjeve nga Associated Press.

Dorëzimim e armëve përmes territoreve të të paktën dy anëtarëve të NATO-s, Turqisë dhe Bullgarisë, ekspertët ushtarakë e konsiderojnë një demonstrim të shtrirjes globale në rritje të Kinës.

Presidenti serb Aleksandër Vuçiç ka njoftuar më parë se ‘armët e reja’ do të prezantohen të martën ose të mërkurën, të cilat do të jenë më të fuqishmet që do të ketë Serbia deri më tani.

Edhe pse Serbia votoi në OKB për rezolutën që dënon sulmin e Rusisë ndaj Ukrainës, ajo refuzoi t’i bashkohet sanksioneve ndërkombëtare kundër aleatëve të saj në Moskë ose të kritikojë drejtpërdrejt krimet e dukshme të kryera nga forcat ruse në Ukrainë, theksojnë mediat amerikane.

Në vitin 2020, zyrtarët amerikanë paralajmëruan Beogradin që të mos blinte sisteme anti-raketë HQ-22, duke thënë se nëse Serbia donte vërtet të bashkohej me BE-në dhe aleancat e tjera perëndimore, do t’i duhej të sillte pajisjet e saj ushtarake në përputhje me standardet perëndimore.

Sistemi kinez kundër raketave krahasohet me sistemin amerikan të raketave Patriot dhe S-300 rus, megjithëse ka një rreze më të shkurtër se sa S-300 më i avancuar.

Serbia do të jetë e para që do të ketë raketa kineze në Evropë.

Në Perëndim ka frikë se armatimet e Rusisë dhe Kinës mund ta shtyjnë Serbinë në një luftë tjetër, veçanërisht kundër Kosovës, e cila shpalli pavarësinë në vitin 2008. Serbia, Rusia dhe Kina nuk e njohin Kosovën, ndërsa Shtetet e Bashkuara dhe shumica e vendeve perëndimore e kanë njohur atë. AP .

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.