“Serbët e Kosovës dëshirojnë siguri dhe mbrojtje”, thotë Kurti në takim me sekretarin e Irlandës Veriore

Kryeministri i Kosovës, Albin Kurti, është takuar me sekretarin e Shtetit për Irlandën Veriore, Chris Heaton-Harris, me të cilin ka diskutuar për kërcënimet me të cilat ballafaqohet komuniteti serb që jeton në pjesën veriore të Kosovës.

Takimi është bërë i ditur përmes një komunikate dërguar mediave.

“Kryeministri përmendi trysninë dhe kërcënimet me të cilat ballafaqohet komuniteti serb në Kosovë, dhe veçanërisht zyrtarët policorë të këtij komuniteti, nga Beogradi zyrtar. Kryeministri evidentoi se qytetarët serbë të Kosovës duan të ndihen të sigurt dhe të mbrojtur si të gjithë qytetarët e tjerë të shtetit”, thuhet në komunikatë.

Nga Kurti, është thënë se komuniteti serb bashkëpunon me policinë në Veri të Kosovës, për të luftuar kundër krimit të organizuar dhe veprimtarive kriminale që ndikojnë negativisht në jetën e tyre të përditshme.

Kurti dhe Harris, diskutuan edhe për mbështetjen e Mbretërisë së Bashkuar ofruar Kosovës.

“Ai foli mbi sfidat dhe mundësitë që i ka Kosova si një shtet multigjuhësor e gjithëpërfshirës”.

“Kryeministri theksoi angazhimin e përkushtimin e Qeverisë sonë për integrimin e komuniteteve joshumicë, sidomos në institucionet shtetërore”.

Më 28 shkurt, kryeministri i Kosovës, Albin Kurti, është takuar me kryetarin e Parlamentit të Irlandës Veriore, Edëin Poots, me të cilin kishte diskutuar për historinë dhe përvojat respektive, veçanërisht në ballafaqimin me të kaluarën e dhimbshme të luftës.

Në takim u përmend po ashtu edhe themelimin e Institutit për dokumentimin e krimeve të kryera gjatë luftës në Kosovë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.