Serbët do të ishin të lumtur të shihnin Ushtrinë e Serbisë në Kosovë, thotë Vuçeviç

Ministri i Mbrojtes, Millosh Vuçeviç, një ditë pas takimeve që patën Albin Kurti e Aleksandër Vuçiç në Bruksel me liderët e Francës, Gjermanisë dhe Italisë e me përfaqësues të Bashkimit Evropian, ka provokuar situatën duke deklaruar se serbët do të ishin të lumtur ta shihnin Ushtrinë e Serbisë në Kosovë.

“Megjithatë, ne duhet të dimë e ta kujtojmë se jemi tërhequr nga Kosova në vitin 1999 në përputhje me Marrëveshjen e Kumanovës dhe Rezolutën 1244 të OKB-së dhe se autoriteti ushtarak atje i është lënë KFOR-it”, ka potencuar ai, raportojnë mediat serbe.

Duke komentuar takimet e ditës së enjte, Vuçeviç, tha se ato ishin të vështira dhe të dhimbshme, por se Serbia “shmangi skenarin për të qenë fajtor e faktor përçarës”.

“Sepse kemi një skenar të përgatitur me qëllim jo vetëm akuzimin e Serbisë, por edhe dënimin e saj”, ka pretenduar ai.

Sipas tij, Serbia është e gatshme të negociojë për të gjitha propozimet që përjashtojnë pavarësinë e Kosovës dhe ulësen në Kombet e Bashkuara.

“Ne nuk pranojmë asnjë formë të njohjes de jure apo de facto të Kosovës si shtet i pavarur. Mund të flasim për gjëra të tjera, qoftë për dogana e vula, pra gjithçka që nuk shpie në pavarësinë e Kosovës”, shtoi ai.

Kryeministri i Kosovës, Albin Kurti, dhe Presidenti i Serbisë, Aleksandar Vuçiç, u pritën të enjten në takime të ndara nga liderët e Gjermanisë, Francës, Italisë, si dhe nga shefi i politikës së jashtme të BE-së, Josep Borrell, dhe përfaqësuesi i posaçëm i BE-së në dialogun Kosovë-Serbi, Mirosllav Lajçak.

Takimet, e cilësuara si përpjekje për të ringjallur dialogun për normalizimin e marrëdhënieve, mbaruan pa ndonjë pajtim mes palëve.

Kurti, ka insistuar në nënshkrimin e marrëveshjeve të arritura në kuadër të prociesit të dialogut për normalizimin e marrëdhënieve me Serbinë, përfshirë edhe “propozimin modern evropian” për statutin e Asociacionit të Komunave me Shumicë Serbe në Kosovë, porse presidenti i Serbisë, Aleksandër Vuçiç, ka refuzuar nënshkrimin e tekstit sikurse në takimet e mëparshme.

Pas takimeve, Kurti tha se vetëm nënshkrimi i marrëveshjeve me vendin fqinj, garanton zbatimin e tyre.

Ndërsa Vuçiç potencoi në një konferencë për media se e ka pranuar themelimin e Asociacionit të Komunave me Shumicë Serbe, sipas propozim-statutit që i është propozuar nga emisarët ndërkombëtarë më 21 tetor në Beograd.

Ai theksoi se Serbia është pro zbatimit të marrëveshjes së Brukselit/Ohrit, por ka shtuar se shteti i tij nuk mund ta njoh Kosovën si vend të pavarur dhe as nuk do ta pranojë anëtarësimin e saj në OKB.

Në anën tjetër shefi i politikës së jashtme të BE-së, Josep Borrell, i cili ndërmjetëson bisedimet për normalizimin e marrëdhënieve Kosovë-Serbi, tha se marrëveshja mes tyre nuk ishte e mundur, sepse “parakushtet e njërës palë ishin të papranueshme për tjetrën”.

“Palët nuk ishin të gatshme të bien dakord për të pa parakushte, e që janë të papranueshme për palën tjetër. Në fund, ne kërkojmë që palët të angazhohen sinqerisht në procesin e normalizimit”, tha Borrell.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.