Senatorët amerikanë kërkojnë dakordim edhe për aneks zbatimin e marrëveshjes ndërmjet Kosovës dhe Serbisë

Në një deklaratë të përbashkët senatorët amerikanë kanë përgëzuar Qeverinë e Kosovës dhe atë të Serbisë për arritjen e marrëveshjes për normalizim të përkohshëm të marrëdhënieve.

Në deklaratën e shkruar nga senatorët Jeanne Shaheen dhe Pete Ricketts, njëri kryesues dhe tjetri anëtar i Nënkomitetit të Senatit për Marrëdhëniet me Jashtë për Evropën dhe Bashkëpunimin Rajonal të Sigurisë, në të cilën kanë marrë pjesë edhe senatorët  Thom Tillis, Chris Murphy, Ron Johnson dhe Chris Van Hollen kanë thënë se ky moment është shumë i rëndësishëm për të dy vendet.

Por, nga të dy shtete dialoguese, senatorët kanë kërkuar që arrihet një dakordim edhe për një aneks i cili do të zbatoj marrëveshjen e arritur.

“Ne i përgëzojmë qeverinë e Serbisë dhe Kosovës për arritjen e një marrëveshjeje të përkohshme për normalizimin e marrëdhënieve. Ky është një moment i rëndësishëm për të dy vendet”.

“Ky përparim mund të zhbllokojë mundësitë e rëndësishme për Kosovën dhe Serbinë, në proceset drejt anëtarësimit në BE dhe rritjen e integrimit ekonomik brenda Ballkanit Perëndimor dhe në mbarë botën”, shkruan në letrën e përbashkët të senatorëve amerikanë.

“Sidoqoftë, të dy liderët tani duhet të bashkohen dhe të arrijnë një marrëveshje për aneksin e zbatimit, i cili do të sigurojë një udhërrëfyes për normalizimin midis dy vendeve. Marrëveshja dhe aneksi i zbatimit kanë implikime të rëndësishme për rajonin më të gjerë, ku ne e dimë se Putini po kërkon të minojë unitetin transatlantik dhe të zgjerojë ndikimin rus”.

“Demokratët dhe republikanët në Senat janë të përkushtuar që të punojnë me qeveritë e Kosovës dhe Serbisë ndërsa finalizojnë aneksin e zbatimit dhe të avancojnë prioritetet që do të sjellin paqe, stabilitet dhe prosperitet në rajon”, thuhet më tej.

Senatorët Shaheen, Tillis dhe Murphy ishin në vizitë në Kosovë dhe Serbi në prill të vitit të kaluar në kuadër të një vizite të delegacionit të Kongresit në Ballkan.

Të hënën e 27 shkurtit kryeministri i Kosovës, Albin Kurti dhe presidenti i Serbisë, Aleksandër Vuçiç u takuan në Bruksel me ndërmjetësim të Përfaqësuesit të Lartë të Bashkimit Evropian, Josep Borrell.

Pas deklaratave zyrtare, u bë e ditur se të dyja palët janë pajtuar për të zbatuar marrëveshjen për normalizim të raporteve në të dyja vendet, të negociuan nga Bashkimi Evropian.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.