Selimi: Njohja e Kosovës nga Spanja s’kalon përmes partive katalanase

Ish-ministri i Punëve të Jashtme, Petrit Selimi, duke komentuar rreth iniciativës së lëvizjes katalanase “Junts” për njohjen e Kosovës, ka theksuar se njohja e shtetit të vogël ballkanik nga Spanja nuk kalon përmes partive katalanase, por përmes dialogut për normalizimin e marrëdhënieve midis Kosovës dhe Serbis nën patronazhin e Bashkimit Evropian (BE).

“Njohja e Kosovës nga Spanja nuk kalon përmes partive katalanase. E vetmja rrugë – dhe nuk ka rrugë tjetër përveç kësaj – është përmes arritjes së marrëveshjes ligjërisht të detyrueshme në dialogun e lehtësuar nga BE-ja. Këtë, qeveritë spanjolle – jozyrtarisht – ia kanë komunikuar qartë Kosovës”, shkroi ish-kryediplomati kosovar në platformën “X” të martën.

Ndryshe, shanset që Spanja të lëvizë drejt njohjes së Kosovës konsiderohen të vogla aktualisht, veçanërisht duke pasur parasysh narrativën historike për refuzimin e shkeljeve të së drejtës ndërkombëtare dhe duke marrë parasysh argumentin e përsëritur se një marrëveshje ligjërisht e detyrueshme ndërmjet Kosovës dhe Serbisë duhet të jetë përpara çdo hapi drejt njohjes.

Një nga pesë vendet brenda BE-së dhe një nga katër vendet e NATO-s që refuzon të njohë Kosovën, shteti spanjoll vazhdimisht etiketon hapin unilateral të Kosovës si shkelje të së drejtës ndërkombëtare, ndonëse perëndimi vazhdimisht rithekson se njohja e Kosovës paraqet një rast sui generis dhe nuk mund të shihet si një precedent për ndonjë situatë tjetër.

Parlamenti i Spanjës do të diskutojë në seancën e fundit plenare para pushimit të verës për nismën e lëvizjen katalanase “Junts” për njohjen e Kosovës, ndërsa votimi në favor ose kundër propozimit do të ndodhë të enjten më 27 qershor 2024. “Junts” akuzon qeverinë spanjolle për standarde të dyfishta në politikën e jashtme kur në pyetje është pavarësia e Kosovës.

Ndërkohë, përderisa Spanja i është bashkuar pjesës tjetër të komunitetit ndërkombëtar në njohjen e shtetit të Palestinës, ajo ecën kundër rrjedhës kur bëhet fjalë për Kosovën – dhe qëndron e izoluar brenda NATO-s dhe BE-së – anëtarët e së cilave mbështesin në masë të madhe pavarësinë e Kosovës.

Pse Spanja (s’)mund ta njohë Kosovën sikurse Palestinën?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.