Santos: Shqipëria, gati për çeljen e negociatave me BE-në

Për eurodeputeten Isabel Santos, Shqipëria është gati për të nisur negociatat e anëtarësimit në Bashkimin Evropian.

Kjo qasje e saj ka ardhur pas një misioni treditor fakt-mbledhës në vend, ku është bindur se Shqipëria i ka përmbushur të gjitha kriteret dhe ka bërë gjithçka i është kërkuar për të nisur negociatat.

Santos u ka drejtuar thirrje vendeve anëtare që të caktojnë Konferencën e parë Ndërqeveritare (IGC).

“Raporti i Komisionit Evropian i muajit të kaluar ka konfirmuar se vendi i ka përfunduar të gjithë hapat e nevojshëm për të filluar bisedimet e pranimit. Këshilli duhet të mbajë Konferencën e parë Ndërqeveritare pa vonesa të mëtejshme”, ka thënë eurodeputetja.

Njëherazi ka këmbëngulur se, për të pasur sukses, në përpjekjet për zgjerim duhet të mbizotërojë dialogu dhe bashkëpunimi mes mazhorancës dhe opozitës ndaj mosmarrëveshjeve politike.

“Ky dialog politik është vendimtar për reformën në sistemin e drejtësisë dhe vazhdimin e procesit të vettngut të të gjithë gjyqtarëve dhe prokurorëve”, ka ravijëzuar ajo.

Në Tiranë, Santos u takua me presidentin Ilir Meta, kryeministrin Edi Rama, kryetaren Lindita Nikolla, drejtues të grupeve politike në Kuvend, si dhe përfaqësues të OJQ-ve, komunitetit mediatik, studentë dhe akademikë.

Gjithashtu vizitoi disa nga projektet e shumta që Bashkimi Evropian financon në vend, si Laboratori Multimedial në Universitetin e Durrësit.

“Jam vërtet e impresionuar nga cilësia e projekteve të shumta që BE financon në Shqipëri. Jo vetëm me fondet e para-anëtarësimit që vazhdojnë të ndahen, por edhe me ndihmën e posaçme për rikuperimin nga tërmeti”, ka pohuar Santos.

Raportuesja e Parlamentit Evropian ka vijuar se “tani po shohim shumë investime të ndryshme, duke përfshirë shkolla shumë cilësore që janë rikonstruktuar me ndihmën evropiane… janë prova e vërtetë që BE-ja është në Shqipëri dhe se integrimi i popullit shqiptar në BE po ndodh çdo ditë falë kësaj pune”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.