Samsung nuk njeh rivalë për telefonat e palosshëm

I mbani mend telefonat e palosshëm? Ato janë rikthyer dhe për të qëndruar gjatë mes nesh.

Samsung e ka konfirmuar veten si prodhuesin më të madh dhe më serioz në serinë e telefonave të palosshëm, duke mos njohur asnjë rival në këtë fushë.

Gjigandi koreano-jugor i teknologjisë, ka prezantuar serinë e re të Galaxy Fold dhe Galaxy Flip, në gjeneratën e tyre të katërt tashmë.

Me një dizajn shumë të ngjashëm me serinë e tretë, por me rafinim të pamjes dhe përditësim e lartësim të parametrave, Fold&Flip do të jenë zgjedhja më e shpeshtë e dashamirësve të ekraneve të palosshëm.

Madje, ky i fundit, në një stil “old school” të telefonave në vitet 2000, po merr gjithnjë e më shumë vëmendje, falë edhe marketingut që Samsung po bën.

Versioni më premium, ai i Z Fold 4, do të nisë të shitet në versionin bazë prej 1 mijë e 799 dollarësh, çmim identik me atë të versionit të kaluar.

Gjithsesi, falë përditësimeve në software, xhami më të fortë dhe parametrave më të lartë, ai është versioni i duhur për këdo që dëshiron një ekran të madh në pëllëmbë të dorës dhe një telefon praktik njëkohësisht.

Nga ana tjetër, versioni Z Flip 4, është shumë më ekonomik, me fillim në 999 dollarë, çmim po i njejtë me versionin e kaluar.

Sërish, përditësimet në software dhe qëndrueshmëria më e lartë e premtuar në tërësi nga Samsung, e bëjnë këtë telefon të jetë i pëlqyeshëm dhe ndër më praktikët në botën e telefonisë mobile.

Ndër të tjera, në eventin teknologjik “Unfold” të organizuar nga Samsung, u pasqyruan edhe hyrjet e reja në fushën e kufjeve si edhe orat e reja.

Galaxy buds 2 pro, do të jenë versioni më i lartë i kufjeve i prodhuar nga Samsung deri më sot, i cili do të sjellë për të parën herë teknologjinë Hi-Fi në kufje me wireless.

Teksa, për orët, entuziastët duhet të ndihen të kënaqur, pasi kompania vjen me dy versione: Galaxy watch 5 dhe watch 5 pro.

Me ndryshime madhore mes njëra-tjetrës, Samsung e mposht gjigandin amerikan Apple në kategorinë e orëve, pasi versioni i ri i Apple Watch ishte paralajmëruar të kishte edhe një version pro, mirëpo koreano-jugorët, nuk pritën gjatë për të bërë lëvizjen e tyre.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.