Samiti i madh, si pasqyrim për propozimin e paqes në Ukrainë

Udhëheqësit botërorë në samitin e Ukrainës për paqen në Zvicër po eksplorojnë mënyra për të garantuar sigurinë e vendeve bërthamore dhe të eksporteve të ushqimit të Ukrainës.

Ata po kërkojnë të miratojnë një komunikatë përfundimtare, e cila fajëson Rusinë për vuajtjet dhe shkatërrimin e përhapur të luftës, të cilën Kievi do ta konsideronte si një sukses.

Por udhëheqësi i Austrisë ka thënë se deklarata nuk pritet të ketë mbështetje unanime nga pjesëmarrësit.

Më shumë se 90 vende dhe organizata ndërkombëtare po marrin pjesë në samitin, që synon krijimin e mbështetjes më të gjerë të mundshme për një proces që mund të ndihmojë në përfundimin e luftës në Ukrainë.

Rusia nuk është ftuar dhe mbështetësi i saj më i madh Kina nuk është e pranishme, duke bërë që disa të hedhin dyshime mbi efektivitetin e samitit.

Disa nga të mbledhurit në resortin zviceran të Bürgenstock nuk janë mbështetësit më të afërt të Ukrainës, duke përfshirë Arabinë Saudite, ministri i jashtëm i së cilës ka paralajmëruar se Ukrainës do t’i duhet të bëjë kompromise të vështira dhe Kenia, e cila u shpreh kundër sanksioneve të fundit ndaj Rusisë.

Drafti i dokumentit përfundimtar, i parë nga agjencia e lajmeve Reuters, bën thirrje që kontrolli ukrainas të rivendoset mbi termocentralin bërthamor të Zaporizhzhia dhe portet e vendit në Detin Azov, të gjitha të pushtuara aktualisht nga Rusia.

Ai gjithashtu i referohet pushtimit të Rusisë si një “luftë”, një etiketë të cilën Moska e ka hedhur poshtë.

Po diskutohen edhe çështje humanitare si kthimi i të burgosurve dhe fëmijëve të rrëmbyer.

Temat më të diskutueshme, si statusi i tokës nën pushtimin rus, do të lihen për më vonë.

Organizatorët e samitit shpresojnë të shpallin një konferencë të dytë, ndoshta në Arabinë Saudite, për të ndërtuar mbi atë që është arritur.

Kryeministri holandez Mark Rutte tha se të pranishmit ishin të bashkuar në kërkimin e tyre për paqen në Ukrainë.

“Ne të gjithë e dimë se jemi vetëm në fillim, fillimi i një rruge drejt paqes,” tha ai.

“Dhe pavarësisht se disa prej nesh rreth kësaj tavoline kanë mendime të ndryshme se si të arrihet paqja për Ukrainën, le të mos ketë asnjë gabim… ne jemi plotësisht të bashkuar në një vizion të përbashkët mbi parimet, mbi vlerat, për mirësjelljen.

“Ju nuk pushtoni një vend tjetër. Ju nuk rrëmbeni fëmijë. Ju nuk luani politikë me furnizimin me ushqime të botës. Dhe nuk rrezikoni sigurinë bërthamore”.

Pritej që të gjitha delegacionet të miratonin një deklaratë përfundimtare që dënonte pushtimin e Rusisë, por kancelari austriak Karl Nehammer u tha gazetarëve të dielën se deklarata nuk do të mbështetej unanimisht.

Presidenti ukrainas Volodymyr Zelensky tha të shtunën se rezultatet e samitit zviceran do t’i komunikohen Moskës “në mënyrë që në samitin e dytë të paqes të mund të rregullojmë fundin e vërtetë të luftës”.

Rusia e ka përshkruar ngjarjen zvicerane si humbje kohe dhe të premten presidenti Vladimir Putin tha se do të pajtohej me një armëpushim nëse Ukraina tërhiqte trupat nga katër rajone të cilat Rusia pjesërisht i pushton dhe pretendon se i ka aneksuar.

Por një ditë më vonë, udhëheqësit perëndimorë që morën pjesë në samit e kundërshtuan me forcë propozimin e Putinit.

Kryeministrja italiane Giorgia Meloni e përshkroi atë si “propagandë” dhe kryeministri i Mbretërisë së Bashkuar Rishi Sunak akuzoi Putinin se “përcillte një tregim të rremë rreth gatishmërisë së tij për të negociuar”.

Më pas, të dielën, zëdhënësi i Kremlinit, Dmitry Peskov, tha se lideri rus nuk përjashtoi bisedimet me Ukrainën, por shtoi se do të nevojiteshin garanci për të siguruar besueshmërinë e tyre dhe se Zelensky nuk mund të ishte pjesëmarrës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.