Rumania ftoi diplomatin rus për të folur për incidentin e dronit

Ministria e Punëve të Jashtme rumune ftoi të ngarkuarin me punë rus në një takim pasi pjesë të reja të një droni të ngjashëm me ato të përdorura nga ushtria ruse u zbuluan në territorin rumun, transmeton agjencia Agerpres.

Pjesë të reja të një droni të ngjashëm me ato të përdorura nga ushtria ruse janë gjetur në territorin e Rumanisë, njoftoi Ministria rumune e Mbrojtjes.

Presidenti rumun Klaus Iohannis tha se kjo tregon një shkelje të papranueshme të hapësirës ajrore rumune.

Ai tha në një deklaratë se kishte informuar Sekretarin e Përgjithshëm të NATO-s, Jens Stoltenberg për pjesët e dronit, i dyti që u rrëzua në territorin rumun këtë javë, dhe se Stoltenberg përsëriti solidaritetin e plotë të aleancës me Rumaninë, raporton Reuters.

“Identifikimi nga autoritetet rumune në territorin e Rumanisë pranë kufirit me Ukrainën e fragmenteve të reja të mjeteve ajrore pa pilot tregon një shkelje të papranueshme të hapësirës ajrore të Rumanisë, një vend i NATO-s, me rreziqe reale për sigurinë e qytetarëve rumunë në atë zonë”, tha Iohannis.

Në ditët e fundit, Rusia ka sulmuar vazhdimisht portet e Ukrainës në Danub, Reni, Izmail dhe Kili.

Ato ndodhen më pak se 500 metra larg territorit rumun dhe janë në sy të banorëve të qyteteve rumune në anën tjetër të lumit.

Të hënën, mbeturinat nga një dron i dyshuar rus ranë në Rumaninë anëtare të NATO-s në një zonë të pabanuar pranë fshatit Plaurua.

Ukraina ishte e para që publikoi informacionin, por Rumania e mohoi menjëherë.

Më vonë ajo pranoi se pjesë të dronit u gjetën në territorin e saj.

Në atë kohë, NATO vlerësoi se ishte një incident dhe jo qëllimi i Rusisë.

Rreth 27 mijë njerëz jetojnë në 32 fshatra në deltën e Danubit me popullsi të pakët.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.