RTK i kërkon EBU-së që të ftohet në edicionin e ardhshëm të “Eurovision Song Contest”

Transmetuesi publik, Radio Televizioni i Kosovës (RTK) i ka dërguar kërkesë zyrtare Unionit Evropian të Transmetuesve (EBU) për pjesëmarrje në Festivalin Evropian të Këngës “Eurovision Song Contest”.

Brenda letrës së dërguar drejt EBU-së, drejtori i RTK-së, Shkumbin Ahmetxhekaj ka kërkuar nga aleanca e organizatave mediatike të shërbimit publik, që mediumit publik të Kosovës t’i dërgohet ftesë për pjesëmarrje në edicionin e ardhshëm të këtij kompeticioni që do mbahet në vitin 2025.

“Me respekt, kërkojmë që të merrni në konsiderim dërgimin e një ftese RTK-së që të marrë pjesë në garën e ardhshme të ‘Eurosong’”, u tha në letrën dërguar EBU-së.

“Pjesëmarrja jonë nuk do të ishte vetëm shpërfaqje e talenteve të Kosovës por gjithashtu do të fuqizonte frymën gjithëpërfshirëse dhe shkëmbimin kulturor që përfaqëson Eurovizioni”- thuhet tutje në letrën e drejtorit Ahmetxhekaj.

Në anën tjetër, kryetari i bordit të RTK-së, Besnik Boletini përmes një postimi në Facebook ka shprehur optimizmin e tij pas kësaj kërkese.

“Pas një angazhimi dy vjeçar për këtë çështje, RTK ka aplikuar në EBU që kënga fituese e Festivalit të Dytë të Këngës në RTK, të marrë pjesë si garuese në Eurovision”, shkroi ai.

“Jemi optimistë për përgjigje pozitive”, shkroi tutje Boletini.

Sipas njoftimit të RTK-së “kjo kërkesë pritet të shqyrtohet së shpejti nga drejtuesit e EBU-së dhe bordit ekzekutiv të Eurovizionit”.

Kosova për herë të parë organizoi Festivalin e Këngës në Radio Televizionin Publik në tetor të vitit të kaluar.

“Eurovisioni”, ose “Eurovision Song Contest”, është një garë muzikore ndërkombëtare që mbahet çdo vit.

E organizuar nga Bashkimi Evropian i Transmetuesve (EBU), Eurovisioni filloi në vitin 1956 dhe që atëherë është zhvilluar çdo vit, duke tërhequr një audiencë të madhe ndërkombëtare.

Në garë marrin pjesë shtete të ndryshme nga Evropa, dhe disa vende të tjera që janë pjesë e EBU-së, si Izraeli dhe Australia.

Eurovisioni përbëhet nga dy gjysmëfinale dhe një finale, që zakonisht zhvillohen në maj. Vendet konkurrojnë fillimisht në gjysmëfinale për të fituar një vend në finale.

Shtetet “Big Five” (Gjermania, Franca, Italia, Spanja dhe Mbretëria e Bashkuar) dhe vendi pritës kalojnë automatikisht në finale.

Publiku dhe juritë profesionale nga çdo vend pjesëmarrës japin pikë për këngët e tyre të preferuara. Pikët kombinohen për të shpallur fituesin. Votimi i publikut njihet si televoting dhe juritë profesionale përbëhen nga ekspertë të industrisë muzikore.

Ngjarja promovon gjithashtu diversitetin kulturor dhe bashkimin ndërkombëtar përmes muzikës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.