Rrustemi i VV-së, Osmanit: Mbi çfarë baze ligjore refuzove që Konjufca ta zëvendësojë Kurtin

Deputeti nga radhët e Lëvizjes Vetëvendosje, Adnan Rrustemi, ka pyetur presidenten Vjosa Osmani, se mbi cfarë baze ligjore ka refuzuar që Glauk Konjufca të zëvendësojë Albin Kurtin, në takimin që e para e vendit e thirri për t’u konsultuar me krerët e partive politike rreth datës së zgjedhjeve të reja parlamentare.

Të mërkurën, Osmani priti në takim krerët e partive politike. Subjekti politik më i madh në vend Lëvizja Vetëvendosje nuk mori pjesë fare në takim.

Nga kjo parti kishin propozuar që Konjufca, nënkryetari i VV-së, njëherit Kryetar i Kuvendit, të jetë përfaqësues i tyre, për shkak të “angazhimeve” të kryetarit Albin Kurti, mirëpo presidenca ka refuzuar atë për shkak se takimi ka qenë i thirrur vetëm për kryetarët e partive.

“Kryeministri Kurti nuk mund të jetë në dy vende njëkohësisht, andaj ai është dashur të peshojë: ta anulojë pjesëmarrjen e konfirmuar qysh para tri javësh në drekë me 21 ambasadorë, apo të shkojë aty dhe në vend të tij me partitë politike te Presidentja Osmani të shkojë nënkryetari i parë dhe kryeparlamentari Konjufca”, shkroi fillimisht Rrustemi në Facebook.

Sipas tij, Kurti “me të drejtë” e ka përzgjedhur të dytën.

“Pyetja që duhet shtruar është: mbi çfarë baze kushtetuese e ligjore Presidentja refuzon zëvendësimin e kryetarit të subjektit politik (që është edhe Kryeministër) me nënkryetarin e parë (që është edhe Kryeparlamentar)?”, shtoi.

Duke folur për mospjesëmarrjen e Kurtit në takim, Osmani, në një konferencë për media të mërkurën, tha se nuk i di arsyet e mungesës së kryeministrit.

“Nënkryetari Glauk Konjufca ka shprehur gatishmëri të plotë të vijë në takim. Por, pasi partitë kanë qenë vetëm në nivel kryetarësh, e kemi mbajtur parimin për të gjithë dhe Konjufca me mirëkuptim e ka zbatuar. Sot nuk ka qenë prezent kryetari i Lëvizjes Vetëvendosje. Nuk i dimë arsyet besoj mund ta pyesni drejtpërdrejt atë, po supozoj se është në zyrë. Kështu që mund të shkoni dhe ta pyesni”, tha Osmani para gazetarëve.

Opozita kërkon zgjedhjet më 26 janar – Osmani do t’i analizojë propozimet

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.