Rrogozhina: Fitore e socialistëve, apo rrëshqitje e radhës e demokratëve?

Zgjedhjet e Rrogozhinës ishin një shuplakë e dyfishtë për opozitën. Partia Socialiste arriti fitoren për të dytën herë radhazi. Kësaj here me një ndryshim: më bindës se më 14 maj.

Nga 21 vota, ndryshorja kapi shifrën e 1 mijë e 700-s.

Por, ku qëndron “sekreti”?

Sa ju përket dilemave dhe pikëpyetjeve të ngritura, Albanian Post ka folur me ekspertë të fushës.

Të gjithë bashkohen në një pikë: mobilizimit të fortë të socialistëve.

Për ish-deputetin demokrat njëkohësisht dhe ish-kandidat për drejtimin e PD-së, Fatbardh Kadilli, “rritja e përfaqësuesit të mazhorancës është rezultat i përqendrimit të gjithë baterive të pushtetit në këtë garë”.

“Më 14 maj energjitë dhe mjetet e fushatës ishin shpërndarë në gjithë territorin. Me përsëritjen e zgjedhjeve në Rrogozhinë u përqendrua gjithë aparati politik dhe shtetëror. Kjo ka bërë që socialistët të nxjerrin në votim edhe ata që nuk morën pjesë herën e parë. Këtu, për mendimin tim, hyjnë socialistë të pakënaqur dhe të dizimpenjuar, pjesa neutrale që shkon pas pushtetit”, thotë ai për Albanian Post.

Nga ana tjetër, njohësi i ligjit dhe politikës Kreshnik Spahiu rendit disa faktorë objektivë dhe subjektivë.

“Historikisht zgjedhjet e pjesshme lokale i ka fituar partia në pushtet. Një pjesë e popullit në provinca apo fshatra janë “interesaxhinj” të vegjël. Ata bëhen me fituesin. Instikt i një shoqërie materialiste. “Katundari” bëhet me të “fortin” jo me të dobtin. Një pjesë e demokratëve e kanë “dredhur” bishtin me arsye, sepse nuk shohin të ardhme me Berishën dhe Metën”.

Ndërsa për analistin Ben Andoni “opozita ka mbetur shumë pas dhe në angazhimet e tyre”.

“Ashtu si në zgjedhjet e 14 majit nuk merren me humbjen dhe të analizojnë në mënyrë statistikore se çfarë nuk shkon, por merren vetëm me Ramën dhe PS-në, që i kanë lënë vetë një territor shumë të madh me mohimin e Reformës Territoriale. Nga ana tjetër, duket se publiku sheh që ndryshimi është ende larg me këtë lloj opozite, ndaj këto janë ndryshoret e ekuacionit që ndikoi për zgjedhjet”, theksoi ai për AP-në.

Ndër të tjera Kadilli ndalet dhe te vetë PD-ja zyrtare, pasi kandidati në garë ishte ai i Bashkë Fitojmë, Shkëlqim Hoxha.

“Disa kundërshtarë të PD zyrtare duan të akuzojnë votuesit e PD zyrtare për këtë diferencë. Ka dhe nga ata që bëjnë sikur e evidentojnë forcën e PD zyrtare duke ia atribuar asaj këtë rezultat. Nuk ka asnjë bazë reale. Votat e kandidatit përputhen me numrin e votave të të dy pjesëve të PD në garën e 6 marsit 2022, si dhe me votat e opozitës në zgjedhjet e 25 prillit 2021”.

E megjithatë, parë në një “terren” më të gjerë, mbase opozita mund të bënte diçka ndryshe.

“Gabimin” e tyre, Spahiu në prononcimin e dhënë për Albanian Post e delegon te keqmenaxhimi. Sipas tij, opozita shqiptare në zgjedhjet bashkiake në Rrogozhinë kishte 5 avantazhe që mund të fitonte vota.

Një prej tyre është se kandidati i koalicionit “nuk kishte asnjë kundërshtar nga asnjë parti tjetër opozitare, pra nuk kishte përçarje votash”.

“Opozita kishte avantazhin e sezonit turistik. Rikthimi i afro 3000 emigrantëve rriti pjesëmarrjen në votime por pavarsisht faktit që emigrantet nuk shiten për 50 euro, opozita nuk i bindi të votonin kundër pushtetit. Zgjedhjet u përsëritën se u konsideruan të manipuluara dhe 200 të burgosur u përjashtuan nga votimi herën e dytë.  Zgjedhjet u përsëritëm pas skandalit të Safet Gjiçit që kishte një impakt tejet negativ për kryetarët lokalë socialistë pas 14 majit. 1 javë para zgjedhjeve në Rrogozhinë SPAK kërkoi arrestimin e zëvendës kryeministrit Arben Ahmetaj dhe opinioni publik u mbars me negativitet kundër socialistëve”, rendit Spahiu.

Në një pikë me të bashkohet dhe Andoni. Por, për të opozita nuk frymëzon.

“Mund të shfrytëzonin dhe të frynin rastin e Gjicit, si pjesë morali i të zgjedhurve socialistë. Mund të shfrytëzonin apatinë e pushtetit lokal në këto ditë nxehtësie, që i takon socialistëve, por ata merren vetëm e vetëm me Ramën dhe akuzojnë e akuzojnë.  Nuk besoj se mund të ndryshonin gjë, sepse nuk e duan në fakt. Njerëzve të PD-së i duhet lufta për të trashëguar asetet e partisë dhe mundësinë se si do jenë konjukturat për të qenë në listën e ardhshme të PD-së”.

Ish-deputeti Kadilli “fajin” e gjen te sigla.

“Bashkia Rrogozhinë është një territor politik me prirje majtas. Por faktori më i rëndësishëm është mosbesimi tek opozita zyrtare që garoj me siglën BF. Shqiptarët e kanë refuzuar këtë projekt opozitar prej shumë vitesh. Kokëfortësia për të vazhduar me të njëjtin projekt të dështuar, me të njëjtët njerëz të konsumuar dhe të refuzuar nga votuesit, si dhe ligësia e atyre që janë të vetëdijshëm për këtë realitet e bën opozitën zyrtare tradhëtare të qytetarëve”.

Me daljen e rezultatit reagimin e parë nga opozita e kishte ish-kryeministri Sali Berisha. Ndërsa, vetë kandidati Hoxha gjeti “kohën” një ditë më vonë për të falënderuar dhe për të shprehur indinjatën.

E me humbjen e zgjedhjeve, humbësit janë të ndryshëm. Publikisht humbi Hoxha, e në prapavijë “qytetarët”.

Kështu, Kadilli thekson se humbjen e pësoi shqiptari i thjeshtë.

Kjo, sepse “është i tradhëtuar nga opozitarët zyrtarë”. “I tradhëtohet shpresa dhe besimi në çdo palë zgjedhje. Berisha dhe Meta e dinin dhe e dinë shumë më mirë se kushdo që nuk janë zgjidhja që duan shqiptarët. Ata janë të vetmit që fitojnë. Ata janë fitues kur shqiptarët humbin”.

Pak a shumë në të njëjtat ujëra qëndron dhe analisti Andoni.

“Drama e vërtetë e PD-së është që nuk kupton në humbjen e tyre, vetë konceptin humbje. Ndërkohë e kanë njerëzit e PD-së në terren të gjithë peshën, që tashmë i kanë larguar nga të gjitha punët”, përsiat ai.

“Grupi ‘Berisha’ vetëm di të justifikohet për çdo humbje. Ata e eksportojnë humbjen sepse e kanë marrë peng PD-në bashkë me grupin tjetër që ka tagrin legal të PD-së. Nëse do t’u dhimbej do të bënin analiza, por ku jemi gati dy e muaj e gjysmë pas zgjedhjeve, ata merren ende me faktin sesi u vodhën zgjedhjet, paçka se në terren gjen edhe shumë raste ku me gati të njëjtën logjikë vepron dhe opozita”.

Dhe Spahiu, ravijëzon se faji i takon Sali Berishës dhe aleatit të tij në politikë, kryetarit të Partisë së Lirisë, Ilir Meta.

“Sali Berisha nuk doli asnjëherë në media pro kandidatit në Rrogozhinë dhe në vend fushatë elektorale për largimin e socialistve, harxhonte kohë me fushatë për largimin e ambasadorit Britanik në Tiranë apo kundër Bill Clinton dhe Soros. Ndërkohë Ilir Meta siç dihet publikisht prej afro dy muajsh ka prerë marrëdhëniet me opozitën se ka hallin e dosjeve në SPAK dhe nuk u përfshi fare në fushatën e Rrogozhinës”.

Efekti politik i krijuar? Për Andonin: asgjë. Për Spahiun: impakt të trefishtë. Dhe për Kadillin: domethënie të rrokshme për këdo.

Ama të tre bashkohen sërish në një pikë të fortë: Zgjedhjet nuk fitohen me alternativën Berishë.

“Për Veliajn do jetë një rezultat që do të justifikojë punën e tij para kolegëve drejtues politikë në qarqe, por edhe një plus në aktivitetin e nesërm të PS-së. I duhet gjithashtu edhe për zhvillimet e ardhshme në PS, që nuk do të jenë aq të mira, që të tregojë arritjet e tij. Kurse për PD-në, do të ligjësojë apatinë që i shoqëron dhe mungesën e organizimit, por edhe rrugën e tyre pa drejtim, nëse vazhdojnë me këtë logjikë”, thotë Andoni.

Kadilli ravijëzon se “nuk ndryshohet pushteti i korruptuar dhe tërësisht i konsumuar i Ramës dhe i kopjeve të tij në bashki sa kohë të mbështesin me vota Berishën dhe Metën”.

“Ata janë kundërshtarë të Ramës, por nuk janë opozitarë të Ramës. Të jesh kundërshtar nuk mjafton, sa kohë je njësoj si ai. Duhet të jesh 100% i ndryshëm nga Rama që të jesh opozitar i Ramës dhe i të ngjashmëve të tij”.

Efektet paszgjedhore, Spahiu i shtrin në disa dimensione.

Sipas tij, nëse për 12 vjet opozita humb sistematikisht kundër Edi Ramës, tani ndoshta duhet të mësohet të humbasë 12 vjet të tjera kundër Erion Velisë.

“Këto zgjedhje provuan që pas çdo skandali që ju del socialistëve ata nuk rrudhen në vot, por fitojnë më thellë. Këto zgjedhje provuan që arrestimi ministrave dhe deputetëve të majtë është përkthyer si standard i ri. Këto zgjedhje provuan që Berisha dhe Meta kanë vdekur politikisht dhe nuk ringjallen. Këto zgjedhje ishin testi i socialistëve që nëse duan mund shpallin zgjedhje të parakohshme dhe i fitojnë sërish thellë”.

Siç duket, zgjedhjet e Rrogozhinës nuk ishim vetëm për Rrogozhinën…

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.