Prej disa kohësh, një rritje përmbajtësore e pagave të administratës publike është paralajmëruar dhe ajo po faktohet sektor pas sektori, duke parë profesione ku rrogat e punonjësve – si në rastin e shëndetësisë – janë rritur edhe deri me 50 mijë lekë.
Më së fundi, vetë kryeministri Edi Rama, u angazhua që t’u komunikonte specialistëve dhe drejtuesve të institucionit ku ai zhvillon detyrën e kreut të shtetit, se pas shumë vitesh, tashmë i takon edhe atyre vetë një rritje thelbësore e pagave.
Kjo, edhe pas kalimeve të njëpasnjëshme në rritjen e pagës minimale, e cila ka kapur tashmë kuotën e 40 mijë lekëve.
Edhe më ambicioz është një plan dy-vjeçar i Qeverisë, për të bërë pagën mesatare, duke përfshirë të gjithë sektorët, 900 euro në rang kombëtar.
Në bazë statistikore, për vitin 2021, paga mesatare në Shqipëri ka qenë në kufijtë e 60 mijë lekëve.
Mirëpo kjo gjë, e stimuluar më së shumti nga sektori publik, i cili shihte paga mesatare në nivelin e thuajse 70 mijë lekëve. Teksa, sektori privat, ndalej në rreth 50 mijë lekë.
Duke pasur parasysh këtë hendek të madh ekzistues, si do të ndikonte një rritje e tillë e mëtejshme e pagave mesatare në sektorin shtetëror, tek industria private?
Sipas ekspertit të ekonomisë, Selami Xhepa, një vendim i tillë do të vendoste në një presion shumë të madh sektorin privat, pasi sipas tij, ende nuk dihet nëse ai i ka apo jo potencialet dhe mundësitë, për të përballuar një parakusht të tillë.
Po ashtu, siç argumenton eksperti, krejt e kundërta duhet të ndodhë, pasi normalisht, sektori privat duhet të jetë ai, i cili me rritjen e pagave duhet të ndikojë në krijimin e një presioni ndaj sektorit publik. Ndërsa, në Shqipëri, po ndodh krejt e kundërta.
“Rritja e pagës, nuk është diçka që realizohet me masa administrative, pas saj ka një racionale ekonomike. Qeveria mund të rrisë pagat në sektorin publik, kjo shërben si indikator për rritjen e pagës mesatare”, thekson eksperti lidhur me çështjen, duke lënë edhe dyshime se deklaratat mund të mbeten thjesht për efekt elektoral.
Sipas Fatos Çoçolit gjithsesi, ekspert i ekonomisë, e gjithë kjo është një lajm i mirë për vendin dhe një objektiv i mundshëm për t’u arritur nga Qeveria.
Madje, sipas tij, në bazë të plan-financimit, një shumë e nevojshme prej 350 milionë eurosh, e cila nevojitet për këtë rritje, është e kapshme për Shqipërinë.
“Prodhueshmëria e mallrave dhe shërbimeve, nëse të jep të drejtë që ta risësh paranë sa një punonjës të jep mesatarisht në njësinë e kohës, atëherë je brenda logjikës ekonomike të rritjes. Unë gjykoj që këto para janë”, përsëriti ai.
Mirëpo edhe përtej kësaj, Xhepa mendon se duke parë si të nevojshme rritjen e pagave dy herë në gati dy vjet, me një masë prej 6-8%, kapërcimi duket galopant dhe i pamundur.
Nga ana e sektorit privat ndërkaq, nuk ka ende një qëndrim lidhur me këtë aspekt, ku thelbësisht, prekja më e madhe që i ndodh, është rritja e detyrueshme e pagave minimale, për punonjësit, të cilët e përftojnë një të tillë.
Kjo është argumentuar më parë se mund të subvencionohet nga shteti, por nuk dihet në çfarë mase do të ketë mundësi të ndodhë.
Në kushte të tilla, mbetet fillimisht për t’u parë se si rritja do të ndikojë vetë sektorin publik e më pas, me thellimin e hendekut, çfarë do të ndodhë edhe me privatin.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
