Gjatë vitit 2023, ekonomia shqiptare rezulton të jetë rritur me 3.94 për qind – krahasuar me vitin pararendës.

Po ashtu rritja e Prodhimit të Brendshëm Bruto (PBB), në terma realë ka shënuar 4.83 për qind në vitin 2022, krahasuar me vitin 2021.

Instituti i Statistikave (INSTAT) ka publikuar statistikat mbi PBB, të rishikuar, duke i paraqitur ato me përmirësime në burime dhe metodologji, bazuar me Kodin e Praktikave të Statistikave Evropiane dhe Politikën e Harmonizuar Evropiane për Rishikimin e Statistikave Makroekonomike, ashtu sikurse kishte njoftuar më parë publikisht, që do të realizohej në shtator 2024.

Rishikimi i serive kohore 2018-2023 – si rezultat i përmirësimeve – rezulton të ketë ndikuar në nivelin e Prodhimit të Brendshëm Bruto (PBB), duke rezultuar në ndryshim në terma nominal 2.48 për qind në vitin 2023 krahasuar me vlerësimet e mëparshme, të cilat bazoheshin në vlerësimet tremujore të PBB-së.

Rritja reale e PBB-së për vitin 2023, referuar INSTAT-it, vlerësohet 3.94 për qind nga 3.45 për qind e publikuar më parë nga vlerësimet e PBB-së tremujore.

Sipas aktiviteteve ekonomike – sa i përket strukturës së PBB-së – peshën më të madhe në ekonomi për vitin 2023 vazhdojnë ta zënë shërbimet, me 47.96 për qind, duke shënuar një rritje në terma realë me 8.26 për qind.

Industria dhe ndërtimi përbëjnë 23.03 për qind të PBB-së.

Lidhur me ndryshimet e aktiviteteve kryesore të ekonomisë konstatohet se në terma realë, industria ra me 2.37 për qind dhe ndërtimi u rrit me 8.48 për qind.

Kurse bujqësia, gjuetia, pyjet dhe peshkimi zënë 16.22 për qind të PBB-së dhe paraqiten me një rënie prej 1.82 për qind në terma realë.

Sa i përket kontributit, “Tregtia, transporti, akomodimi dhe shërbimi ushqimor” patën ndikimin më të madh prej 1.65 për qind.

“Administrata publike, arsimi dhe shëndetësia” ndikoi me 1.00 për qind, “Ndërtimi” me 0.98 për qind, “Aktivitete profesionale, administrative dhe mbështetëse” me 0.76 për qind, “Arte, argëtim dhe çlodhje, aktivitete të tjera shërbimi” me 0.23 për qind dhe “Informacioni dhe komunikacioni” me 0.15 për qind.