Rritja e çmimit të naftës, qindra qytetarë mblidhen para Kryeministrisë

Siç ishte thirrur nga shoqëria civile ka nisur protesta përpara Kryeministrisë së Shqipërisë për rritjen e çmimeve, konkretisht për rritjen e rrufeshme të çmimit të naftës brenda ditës së 7 marsit.

Qindra qytetarë, aktivistë, artistë janë bashkuar për të ngritur zërin kundër kësaj rritje duke i kërkuar qeverisë të ndërhyjë dhe të përmirësojë politikat rregullatorë.

Me pankarta në duar ata thërrasin njëzëri: “Rama ik, Rama ik! Ulni taksat! Poshtë komunizmi!”

Ndërkaq protestuesit kanë theksuar se protesta nuk do të ndalet dhe të tjera priten në ditët në vijim. Sërish ata njoftuan për protestë të enjten më 10 mars në orën 17:00, ndërsa bënë thirrje që në mesditë në orën 15:00 të fiken makinat.

Ndërsa të premten shoqata e taksive ka paralajmëruar për protesta.

Çmimi i naftës në Shqipëri ka kapur shifrën e 230 lekëve për litër. Kjo vlerë është parë vetëm përgjatë krizës së madhe të naftës në vitet 2000.

Rritja e saj është parë dhe në nivel global, ku për shkak të krizës Ukrainë-Rusi, çmimi për fuçi i naftës ka kapur vlerën e 100 dollarëve, 80% më shumë se fillimviti i 2021-it.

Në një dalje për mediat, ministrja e Financave dhe Ekonomisë, Delina Ibrahimaj, deklaroi se pritet një stabilizim i çmimeve të naftës nga gjysma e vitit 2022.

Ibrahimaj tha se çmimi i naftës dhe i gazit në vend është rritur nga mospërputhja në tregjet ndërkombëtare, mes kërkesës së shtuar dhe ofertës së limituar.

Deklarata e saj, erdhi në një kohë kur nuk ka pasur përshkallëzim të situatës mes Ukrainës dhe Rusisë.

Ndërsa një ditë më parë kryeministri i Shqipërisë, Edi Rama, ka zyrtarizuar krijimin e një “komiteti të posaçëm” për përballimin e krizës nga lufta në Ukrainë.

Këtë deklaratë, numri një i qeverisë e dha gjatë një konference të thirrur me gazetarët.

Rama shtoi se një krizë e paralajmëruar e energjisë elektrike nuk përfshinte edhe preludin e një agresioni të armatosur rus.

Ndërsa fliste për rritjen e çmimit të naftës në Shqipëri, Rama kujtoi kontributet që përfshihen në tarifën e saj.

Kontribute, të cilat, vendet e tjera i paguajnë jashtë çmimit të naftës, sqaroi kryeministri.

“Çmimi i naftës nuk varet nga qeveria, që ngre çmime apo që ul çmime të mallrave të konsumit, por i vendos tregu”, shtoi Rama.

Kreu i qeverisë shqiptare theksoi se, në kuadër të paparashikueshmërisë që ka situata në Evropë, autoritetet janë të përgatitura për të gjitha skenaret.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.