Rritja e çmimeve të energjisë elektrike “s’është e rastësishme, por e qëllimshme”

“Me ndryshime të mëdha të çmimeve të energjisë elektrike në muajin dhjetor u ballafaqova edhe unë”, thotë ish ministri i Financave, Haki Shatri.

Shatri është një nga mijëra qytetarë të Kosovës që zemërimin për rritjen shumëfishore dhe të papartishme të faturave të rrymës e kanë bërë publik në rrjetet sociale.

Nga kompania përgjegjëse KESCO u arsyetuan duke thënë se është rritur si pasojë e “shpenzimit më të madh të rrymës”, por kjo rezulton të mos jetë e vërtetë, sepse shumë veta kanë dëshmuar që kanë shpenzuar edhe më pak dhe po paguajnë trefish nga muaji i kaluar, apo krahasuar me muajin e njëjtë të vitit paraprak.

Shatri, në një bisedë për Albanian Post, pas rritjes së çmimeve të energjisë, e ku faturat tek qytetarët kanë ardhur me një çmim marramendës, ka deklaruar se këto çmime janë bërë me qëllim.

“Këto çmime janë bërë me qellim. Nuk janë ata amatorë që u ka rrëshqitur dora kur kanë kalkuluar çmimin e rrymës, por janë veprime të bëra në mënyrë të qëllimshme që t’i mbulojnë dështimet që kanë bërë. Duke filluar që nga mbulimi i pagesës në Veri, që nuk e dëshmojnë asnjëherë”.

“Prandaj edhe vijnë këto vendime skandaloze dhe i bëjnë përgjegjës qytetarët t’i paguajnë. S’është as e rastësishme as e gabueshme, por e qëllimshme”, thotë Shatri për AP.

Ai thekson se çmime të tilla e dëmtojnë buxhetin e qytetarëve jashtëzakonisht shumë, veçanërisht kur këto vendime bëhen pa paralajmërime.

“Krahas me rritjen e çmimeve të tjera; inflacionin për shembull, ku indeksi i çmimeve sipas rritjes së çmimeve është mbi 5%. Është e pamundur që të iu shmangesh këtyre obligimeve sepse ta ndërpresin energjinë, janë si vendime të gjykatës që nuk ke ku të ankohesh”.

Për njohësin e çështjeve të energjisë, Vezir Rexhepi, mënyra se si çmimet e energjisë janë kalkuluar për muajin dhjetor janë të palogjikshme.

Rexhepi, në një bisedë për Albanian Post sqaron se kur shpenzimi i energjisë është rreth 800 kË, faturimi duhet të vijë rreth 90 euro.

Prandaj sipas tij, faturat e publikuara nga qytetarët janë jashtë normales.

“Zyra e Rregullatorit të Energjisë ka caktuar edhe tarifa deri në 800 kË, duke kërkuar që të mos ketë rritje më të madhe të energjisë. Faktikisht, po themi që nëse e marrim një vlerë dikund 800 kË të konsumatorit, atëherë vlera e çmimit nuk mund të shkoj më lart se 90 euro, ndërsa vlera 900 kË mund të sillet rreth 95 euro”.

Megjithatë, ai përmend disa nga arsyet që mund të kenë sjellur deri tek rritja e çmimeve të energjisë në muajin dhjetor.

“Mungesa e energjisë elektrike, ndikimet ekonomike, lufta në Ukrainë, të gjitha këto e bëjnë të vetën dhe ne jemi një treg shumë i vogël për të pasur ndikim për zvogëlim të energjisë elektrike ose rritje”.

“Por, për shembull për 1 mijë megavat të shpenzimit të energjisë të vij fatura me çmime 200 – 250 euro është jo normale. Këto shifra nuk janë caktuar në mënyrë të duhur nga Zyra e Rregullatorit për Energji”.

ZRRE-ja: S’kemi pranuar asnjë ankesë nga konsumatorët

Nga Zyra e Rregullatorit për Energji (ZRRE), në një përgjigje për Albanian Post kanë bërë thirrje që të kontaktojnë me kompaninë furnizuese dhe në rast se janë të pakënaqur të drejtohen tek zyra e ankesave.

“ZRRE-ja, inkurajon të gjithë  konsumatorët që ta kontaktojnë furnizuesin (KESCO),  në qoftë se kanë shqetësime apo vërejnë parregullsi ne faturat e tyre. ZRRE-ja,  ka një proces për ankesat e konsumatorëve që konsumatorët e përdorin gjatë gjithë kohës për zgjidhjen e çështjeve  në lidhje me leximin e njehsorëve, faturimin, dhe çështje të tjera”.

Ndërsa, kanë thënë se ky institucion s’ka pranuar asnjë ankesë.

“Aktualisht, ZRRE-ja  nuk ka pranuar ankesa te konsumatorëve për faturimin e këtij muaji”, ka thënë ZRRE-ja për Albanian Post.

Po ashtu, kanë sqaruar se çmimet e energjisë elektrike me rritje janë duke u aplikuar në të gjitha faturat.

“Çmimet e energjisë elektrike janë duke u aplikuar në te gjitha faturat e energjisë elektrike për energjinë e konsumuar sipas çmimeve te vendosura me datë 30 mars 2023 përmes vendimit V_1713_2023 nga Zyra e Rregullatorit për Energji”.

“Rritja e konsumit në ketë muaj ka te bëjë me konsumin e konsumatorëve të cilët energjinë elektrike e përdorin për ngrohje”.

KESCO: Vlera e faturës së dhjetorit u rrit, pasi konsumatorët po e përdorin rrymën për ngrohje

Pas të gjitha ankesave të qindra qytetarëve Kompania Kosovare për Furnizim me Energji Elektrike, ka thënë se faturat janë shtrenjtuar meqë qytetarët po e përdorin energjinë elektrike për ngrohje.

“Rritja e vlerës se faturave në ketë muaj dimri është rezultat i rritjes së konsumit të energjisë elektrike, veçanërisht te konsumatorët që e përdorin energjinë elektrikë për ngrohje. Konsumimi i energjisë elektrike në vlerë më shumë se 800 kWh në muaj faturohet me tarifë më të lartë, ashtu siç paraqiten në çdo faturë te konsumatorëve“, thuhej në reagim.

Sipas KESCO-s, efekti tjetër i rritjes së vlerës së faturës është që vitin e kaluar në të njëjtën periudhë, Qeveria e Kosovës ka subvencionuar konsumatorët që kanë kursyer energji elektrike.

“Disa konsumatorë po marrin fatura më të larta sepse po përdorin masivisht energjinë elektrike për ngrohje. KESCO është e përkushtuar në vazhdimësi që të bëjë thirrje për kursim dhe shfrytëzim efikas të energjisë elektrike, duke ndarë këshilla praktike për secilën kategori të konsumatorëve, pikërisht për të mbrojtur konsumatorin dhe sistemin elektrik nga këto ngarkesa”.

Më 26 prill, Qeveria e Kosovës, kishte bërë të ditur se ka përfunduar  subvencionimi i faturave të konsumatorëve që kursejnë energjinë elektrike.

Nga kjo masë, e cila ka filluar në muajin shtator të vitit të kaluar, kanë përfituar rreth 200 mijë familje dhe janë kursyer 88 milionë euro nga importi, kishte thënë ministri i Financave, Punës dhe Transfereve, Hekuran Murati, në një konferencë për media, së bashku me shefin e Zyrës së Bashkimit Evropian në Kosovë, Tomas Szunyog.

Nga ky muaj Qeveria e Kosovës kishte subvencionuar faturat e konsumatorëve, të cilët kishin kursyer së paku 5 për qind të energjisë së konsumuar në muaj, krahasuar me muajin e njëjtë të vitit paraprak.

Murati tregoi se subvencionimi për tre muajit e parë (shtator, tetor, nëntor) janë paguar nga buxheti i Kosovës, ndërsa katër muajt e tjerë (dhjetor 2022, janar, shkurt, mars 2023) janë paguar nga fondet e Bashkimit Evropian në shumën prej 15 milionë eurosh.

Nga 1 prilli i 2023-ës qytetarët në Kosovë kanë nisur t’i paguajnë faturat e energjisë elektrike për 15 për qind më shtrenjtë.

Ky vendim është marrë në muajin mars nga Zyra e Rregullatorit për Energji Elektrike.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.