“Rritja e bruto-produktit vendor”, Kurti “mjeshtër i propagandës”

Deklarata e kryeministrit Albin Kurti, për rritje të bruto produktit vendor gjatë qeverisjes së tij dhe krahasimi i kësaj rritje të pretenduar me periudha të caktuara kohore, në një kohë kur qytetarët e Kosovës përballen me situatë të rënduar ekonomike, dhe kur ka ikje të konsiderueshme të të rinjve nga vendi, sipas ekspertëve të çështjeve ekonomike është një interpretim jo serioz i ekonomisë.

Sipas të pronocuarave të Albanian Post, kreu i ekzekutivit sa herë flet për ekonomi demantohet nga të gjitha ata që janë kompetent për këtë fushë.

Kryeministri Kurti në pritjen shtetërore në nder të 25-vjetorit të çlirimit të Kosovës, të mërkurën, por edhe në mbledhjen e qeverisë të enjten, tha se bruto produkti vendor, “sivjet do të jetë 5 herë e gjysmë sesa në vitin 2000, gati tri herë më i madh se në vitin e shpalljes së pavarësisë 2008, dhe 50 për qind më i lartë sesa para 4 vjetëve”.

Por, sipas ish-Ministres së Financave, Hykmete Bajrami, Kurtin, sa i përket ekonomisë, e demantojnë të gjitha institucionet që janë të thirrura për matje ekonomike.

Në një prononcim për Albanian Post, nënkryetarja e Lidhjes Demokratike të Kosovës (LDK), thotë se kryeministrin e demanton edhe Agjencia e Statistikave të Kosovës (ASK), që operon në kuadër të zyrës së vet.

“Kryeministri Kurti si mjeshtër i propagandës që është po e krahason vitin 2024 me vitin 2000, me vitin 2008 dhe po flet në terma nominal që d.m.th po e përfshin edhe normën e inflacionit që vetëm në mandatin e tij është mbi 25 për qind”, theksoi Bajrami.

Rritja ekonomike, theksoi ajo, matet në terma real jo në terma nominal, ashtu siç bën Kurti.

“Edhe po ka mundësi që Brutoprodukti Vendor në vitin 2000 ka qenë 420 milionë euro, po e them ka mundësi sepse në atë kohë s’ka pasë as matje të sakta, por kjo ngase baza ka qenë zero. Kurti le të del dhe le të na tregon se sa ka qenë vlera e Bruto Produktit Vendor në vitin 1999 dhe i kujt ishte faji për atë gjendje”, e sfidoi deputetja e LDK-së kryeministrin.

Vet fakti që Kurti ka nevojë me krahasu qeverisjen e tij me vitin 2000, sipas saj, “flet shumë”, në fakt, Bajrami vlerëson se kjo i tregon të gjitha, “kur duhesh me u kthy një çerek shekulli mbrapa për me bë diferencën”.

Sipas ASK-së, Kosova e ka mbyllë vitin 2023 me rritjen ekonomike me të ulët në 10 vitet e fundit 3.3 për qind (përjashto vitin 2020 kohën e pandemisë).

“Të gjithë indikatorët ekonomik të vitit 2023 flasin për regres: deficit tregtar ka arrit shifra alarmante për herë të parë është 4 miliardë e 926 milionë euro, kemi pas rënie të eksportit në krahasim me vitin paraprak, gjithashtu edhe trendi i krijimit të vendeve të punës është negativ sepse derisa në vitin 2021 janë krijuar 22 mijë vende pune, në vitin 2022 janë krijuar 18 mijë e në vitin 2023 vetëm 17 mijë vende të reja pune sipas të dhënave të ATK-së”, shpjegon ish-Ministrja e Financave.

Por, megjithatë, Bajrami tregoi sipas saj se çfarë është bërë gjatë qeverisjes së Kurtit.

“Është rritë korrupsioni përmes tenderëve njëburimor dhe jo vetëm, ka nepotizëm dhe kapje të paparë të institucioneve, janë rritë çmimet, sidomos ato të produkteve të domosdoshme mbi 50%, qeveria nuk ka ndërmarrë asnjë reformë fiskale, nuk ka ndërmarrë asnjë reformë strukturore për përmirësim të ambientit të biznesit, e ka dëmtu imazhin e vendit dhe që tri vite nuk ka asnjë investim serioz në vend, vendi është nën sanksione nga BE, niveli i investimeve publike është i njëjtë me atë të vitit 2017, andaj edhe kemi ikje masive të qytetarëve”, shtoi.

Në këtë drejtim, Bajrami vlerëson se të gjitha këto e kanë zvogëluar trendin e rritjes së ekonomisë.

Nga ana tjetër, koordinatori për Financa në kuadër të Kabinetit për Qeverisje të Mirë të Partisë Demokratike të Kosovës (PDK), Arben Mustafa, si jo serioze i ka konsideruar deklaratat e Kurtit për ekonominë.

“Ky është një interpretim shumë joserioz i ekonomisë, që fatkeqësisht po ndodhë nga Kryeministri i vendit”, ka thënë Mustafa për AP.

Kjo qeveri, sipas këndvështrimit të tij, “e ka zhytur vendin në zymtësinë më të madhe në 20 vitet e fundit”.

“E ka rritur pasigurinë për sektorin privat dhe ka përdorur taksat e qytetarëve për qëllime që nuk kane asgjë të bëjnë me krijim të kushteve për zhvillim ekonomik”, shtoi.

Ndërsa, për ish-kryetarin i Odës Ekonomike të Kosovës, Safet Gërxhaliu, Kosova nuk ka arsye për eufori, siç po bën Kurti me këto pretendime të tij për zhvillim ekonomik, por “ka arsye për brengosje.

“Qytetari është ai që e shijon qoftë trendin pozitiv, qoftë negativ në ekonomi. Në këtë drejtim, zhgënjimi ekonomik dhe politika e rënduar sociale është brengë kryesore e qytetarëve të Kosovës”, thekson Gërxhaliu në një bisedë për AP.

Këto të dhëna që i ka paraqitur kryeministri, në prizmin e ekspertit të eksonomisë, janë shumë më tepër paralajmërim i kampanjës zgjedhore “se sa realitet me të cilin mund të krenohet qeveria”.

“Në qoftë se qeveria mendon se rritja ekonomike arrihet vetëm nga eksportet e parasë së gatshme, vetëm me rritje të importeve dhe tkurrje të investimeve qoftë të huaja, qoftë të brendshme, është një temë e cila duhet të analizohet, por edhe duhet të argumentohet”.

Për Gërxhaliun, aktualisht “jemi në një pozitë të vështirë”, pasi që “kemi rënie të eksporteve, kemi ikje të qytetarëve, dhe krahas ikjes së qytetarëve kemi ikje të kapitalit”.

“Kjo duhet të jetë brenga dhe jo të krenohemi me periudha të ndryshme kohore, në veçanti kur vitet e fundit kanë qenë vite kritike që ekonomia është përcjellë me një inflacion që ka lënë gjurmë të mëdha në shoqërinë kosovare”.

Ndryshe, opozita, por edhe njohësit e çështjeve ekonomike, e kanë kritikuar vazhdimisht qeverinë e drejtuar nga Albin Kurti për politikat ekonomike, posaçërisht për mungesën e investimeve kapitale.

Për shkak të mungesës së mirëqenies, një numër i madh i të rinjve kosovarë janë duke u larguar nga Kosova në drejtim të vendeve perëndimore, për të kërkuar kështu një jetë më të mirë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.