Lajme

Rritet për afër 30% deficiti tregtar i Kosovës


Objekti i Qeverise se Kosoves

Deficiti tregtar i Kosovës është rritur afër 30% nëse krahasohet muaji dhjetor i vitit 2021 me të njëjtin muaj të vitit paraprak.

Sipas Agjencisë së Statistikave të Kosovës, referuar të dhënave nga Tregtia e Jashtme e Mallrave në Kosovë, ka një “deficit tregtar më të lartë për 27.8% në muajin dhjetor 2021, në raport me periudhën e njëjtë të vitit 2020”.

Përkthyer në euro, deficiti tregtar është në vlerë prej 394.9 milionë euro, krahasuar me deficitin 309.1 milionë Euro në vitin 2020.

Bizneset kosovare kanë eksportuar mallra gjatë dhjetorit të vitit 2021 vetëm 65 milionë euro, derisa importi kap vlerën e 460 milionë eurove.

“Sipas të dhënave të grupeve kryesore të eksportit: 30.5% e përbëjnë artikujt e ndryshëm të prodhuar; 22.1% e përbëjnë metalet bazë dhe artikujt prej tyre; 11.8% e përbëjnë plastika, goma dhe artikujt prej tyre, kurse 9.0% e përbëjnë ushqimet e përgatitura, pijet dhe duhani dhe 5.1% e përbëjnë produktet minerale”.

Ndërsa, sipas të dhënave të grupeve kryesore për import: 15.0% e përbëjnë produktet minerale; 14.0% e përbëjnë makineritë, pajisjet mekanike dhe elektrike; 12.5% e përbëjnë ushqimet e përgatitura, pijet dhe duhani; 9.3% e përbëjnë metalet bazë dhe artikujt prej tyre; 8.6% e përbëjnë mjetet e transportit dhe 6.9% e përbëjnë plastika, goma dhe artikuj prej tyre”.

Ilustrim: Nje kamion me mallra ne kufirin e Kosoves

Eksporti i mallrave kosovare bëhet edhe në disa vend të Bashkimit Evropian, ku kryesisht prinë Gjermania, Italia dhe Holanda, derisa importi nga BE-ja vjen po ashtu nga Gjermania, Italia, Sllovenia, por edhe Greqia.

Bilani negativ tregtar dhe probleme të tjera të bizneseve në Kosovë kanë alarmuar pronarët dhe ekonomistët e vendit, që vazhdimisht i kanë bërë thirrje qeverisë për rishqyrtim të masave të reja, me të cilat është prekur negativisht biznesi.

“Kriza ekonomike është shumë më e rëndësishme në këtë momentum që jemi”, ka deklaruar Sekretari i Shoqatës së Gastronomeve të Kosovës, Arian Vranica, në një prononcim për Albanian Post.

Edhe ekonomisti, Erton Bega, në një komunikim për AP-në pohoi se kjo krizë ekonomike, e shkaktuar nga situata me pandeminë COVID-19 po sjellë varfri në Kosovë.

Ndryshe, rreth 40 mijë punëtorë e kanë humbur vendin e punës dhe 64 mijë persona e kanë lëshuar vendin e punës për shkak të mostrajtimit adekuat nga institucionet në vitin 2021.

/Albanianpost.com


Lajmet kryesore