Rritet numri i të infektuarave me COVID-19 në Kinë, mbyllen shkollat

Kina po përballet me një shpërthim të radhës së rasteve pozitive me COVID-19, derisa 3 mijë e 400 persona kanë rezultuar pozitiv, duke dyfishuar numrin e një dite më herët.

Kjo rritje e rasteve me Coronavirus, ka bërë që autoritetet kineze nga frika e një shpërthimi të madh, të mbyllin shkollat në Shangai, si dhe në disa qytete tjera veri-lindore.

Qyteti i Jilin është mbyllur pjesërisht, me qindra lagje të mbyllura, njoftoi një zyrtar të dielën, ndërsa Yanji, një zonë urbane prej afro 700 mijë banorësh në kufi me Korenë e Veriut, u mbyll e tëra.

Kina, ku virusi u zbulua për herë të parë në fund të vitit 2019, ka mbajtur masa të ashpra sa i përket virusit.

Por, ky shpërthim i fundit nga varianti Omicron, e ka bërë të vështirë mbrojtjen e qytetarëve nga virusi.

Sipas asaj që raportojnë zyrtarët e qytetit Jilin, banorët e këtij qyteti deri më tani kanë përfunduar gjashtë raunde të testimit masiv, derisa të dielën qyteti raportoi më shumë se 500 raste pozitive.

Qyteti fqinj i Changchun – një bazë industriale me 9 milionë banorë – u mbyll të premten.

Qytetet më të vogla Siping dhe Dunhua, të dyja në provincën Jilin, u mbyllën të enjten dhe të premten, sipas njoftimeve zyrtare.

Zyrtarët shtetërorë në Kinë po kërkojnë masa më të rrepta ndaj virusit, ndërsa bizneset atje kanë thënë se këto masa po e dëmtojnë ekonominë e vendit.

Por, në qytetin më të madh të Kinës, Shangai, autoritetet frikësohen nga shpërthimi i radhës në COVID-19, teksa janë duke mbyllur shkollat, bizneset, restorantet dhe qendrat tregtare.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.