Rrëzimi i Ligjit për Byronë, Tahiri: Fitore e drejtësisë përballë përpjekjeve arbitrare të pushtetit

“Anulimi i Ligjit për Byronë Shtetërore për Verifikimin dhe Konfiskimin e Pasurisë së Pajustifikueshme është fitore e Shtetit të së Drejtës përballë përpjekjeve të vazhdueshme arbitrare të këtij pushteti për të zëvendësuar drejtësinë që duhet ta japin gjykatat me një byro partiake që do të shkatërronte sigurinë juridike të qytetarëve në emër të ‘reformës’ në drejtësi”, ka thënë Abelard Tahiri.

Këto komente, Shefi i Grupit Parlamentar të Partisë Demokratike të Kosovës (PDK), i ka bërë përmes një postimi në Facebook, pak pas vendimit të Gjykatës Kushtetuese, e cila e shpalli antikushtetues Ligjin për Byronë Shtetërore për Verifikimin dhe Konfiskimin e Pasurisë së Pajustifikueshme, pasi ka gjetur plotë 10 pika në kundërshtim të plotë me Kushtetutën e Kosovës.

“Kjo është fitore e sundimit të ligjit dhe e të drejtave të njeriut mbi tendencën për frikësim e shantazh nga pushteti!”, shkroi Tahiri.

Sipas deputetit të PDK-së, edhe ky Ligj është dëshmi që pushtetit aktual “më shumë i intereson propaganda sesa shteti ligjor”, sepse, siç pohon ai, “përndryshe do t’i zbatonin ligjet që i kanë trashëguar për konfiskimin e pasurisë së paligjshme”.

“Po ashtu, ky Ligj, i rrëzuar sot nga Gjykata Kushtetuese, ishte kundër standardeve dhe praktikave më të mira ndërkombëtare, sepse ishte një kopje e ligjit të Bullgarisë, i cili, vitin e kaluar, u rrëzua nga Gjykata Evropiane për të Drejtat e Njeriut”, potencoi.

Ai ka falënderuar deputetët e PDK-së dhe ekspertët për punën profesionale në argumentimin e suksesshëm të rastit, si dhe “për vendosmërinë që bindjen dhe drejtësinë të mos ia nënshtrojnë  propagandës dhe narracioneve populiste”.

Çka ndodhi?

Gjykata Kushtetuese e Kosovës e ka shpallur antikushtetues edhe Ligjin për Byronë Shtetërore për Verfikimin dhe Konfiskimin e Pasurisë së Pajustifikueshme, pasi ka gjetur plotë 10 pika në kundërshtim të plotë me Kushtetutën e Kosovës.

Prandaj, Gjykata ka vendosur “të shpallë të pavlefshëm, me pesë (5) vota për dhe katër (4) vota kundër, në tërësinë e tij, Ligjin nr. 08/L-121 për Byronë Shtetërore për Verifikimin dhe Konfiskimin e Pasurisë së Pajustifikueshme”.

Në vendim janë dhënë edhe të gjitha nenet dhe paragrafët ku janë diktuar shkeljet kushtetuese të ligjit që qeveria e proklamonte si ligji që do të mundësonte reformën në drejtësi.

Gjykata ka gjetur se ligji për Byron provonte të përmbyste krejtësisht funksionimin e sistemit juridik në Kosovë ku më nuk do të kishin barrën e provës organet akuzuese, por vetë individi që po akuzohej.

Pra, siç e shpjegon gjykata, “standardi i të provuarit nuk është ai penal i ‘dyshimit të bazuar’, por ai civil i ‘vlerësimit të gjasave’”.

Me këtë ligj, krejt cfarë duhej të ndodhte ishte që gjykata “beson që një gjë ka më shumë mundësi të jetë apo të ketë ndodhur se sa jo”, e jo ta provojë faktikisht krejtësisht.

Për më tepër, dhe përderisa Byroja Shtetërore ka barrën fillestare të argumentimit që pasuria konfiskimi i të cilës propozohet është e pajustifikuar, barra për të dëshmuar që pasuria në fakt është e justifikueshme, bie mbi individin.

3 vjet qeveri, 8 shkelje kushtetuese

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.