Rreth 400 të vdekur nga përmbytjet në Afrikën e Jugut

Ka shkuar në 395, të premten e 15 prillit, numri i të vdekurve nga përmbytjet në bregun lindor të Afrikës së Jugut.

Nga përmbytjet e kësaj jave në provincën KwaZulu-Natal janë rrëzuar linjat e energjisë elektrike, janë mbyllur shërbimet e ujit, është ndërprerë funksionimi në një nga portet kyç të Afrikës, ndërsa autostradat dhe plazhet janë mbushur me mbeturina, duke prekur më shumë se 40 mijë njerëz.

Autoritetet e Afrikës së Jugut kanë lëshuar fonde emergjente të premten për të ndihmuar dhjetëra mijëra njerëz, të cilët kanë mbetur pa strehë, ujë dhe energji elektrike.

Ministri i Financave, Enoch Godongwana, për stacionin televiziv “Newsroom Africa” tha se fillimisht 1 miliard rand (68.3 milionë dollarë) për ndihmë emergjente ishte i disponueshëm për përdorim të menjëhershëm, pasi provinca u shpall një zonë fatkeqësie.

Autoritetet lokale e kanë vlerësuar dëmin në disa miliardë randë.

Stacionet televizive lokale treguan vullnetarë që pastronin kontejnerë plastikë, grumbuj bambush dhe drurësh nga plazhi i Durban-it.

Shkencëtarët besojnë se bregdeti juglindor i Afrikës po bëhet më i prekshëm ndaj stuhive të furishme dhe përmbytjeve pasi emetimet njerëzore të gazeve që bllokojnë nxehtësinë shkaktojnë ngrohjen e Oqeanit Indian.

Ata presin që tendenca të përkeqësohet në mënyrë dramatike në dekadat e ardhshme.

Aktivistët lokalë të klimës po bëjnë thirrje për investime më të mëdha, për të ndihmuar komunitetet të përgatiten më mirë për goditjet e motit.

Në një procesion të heshtur në Durban, për të shënuar fillimin e fundjavës së Pashkëve, adhuruesit e krishterë vendosën lule në një kryq.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.