Rreth 300 qytetarë në veri konvertuan patentë-shoferët ilegalë vetëm të mërkurën

Zëvendësdrejtori i Policisë së Kosovës për rajonin e veriut, Veton Elshani, në një përgjigje për “Klan Kosova” të mërkurën, ka njoftuar se vetëm më 7 gusht, rreth 300 qytetarë nga radhët e komunitetit serb në katër komunat veriore të Kosovës – Mitrovicë e Veirut, Zveçan, Leposaviq dhe Zubin Potok – kanë konvertuar patentë-shoferët ilegalë në RKS (Republika e Kosovës).

“Në Mitrovicën e Veriut janë lëshuar 51 patentë-shoferë, në Leposaviq 109, në Zveçan 48 dhe në Zubin Potok janë lëshuar 33 patentë-shoferë”, ka thënë zyrtari policor, ndërsa numri i përgjithshëm i qytetarëve nga komuniteti serb, në të gjitha komunat e Kosovës, që kanë aplikuar deri më sot për konvertim të patent-shoferëve ilegalë të Serbisë ka shkuar në 5 mijë e 588.

Ndryshe, autoritetet kosovare kanë paralajmëruar se nuk do t’i tolerojnë patentë-shoferët që u lëshohen serbëve të Kosovës nga Serbia, pas skadimit të afatit për pajisjen e tyre me patentë shoferë të Kosovës. E afati për konvertim të patentëve skadon edhe dy ditë, përkatësisht më 9 gusht 2024.

Në bazë të Ministrisë së Punëve të Brendshme të Kosovës (MPB), qyetetarët që refuzojnë t’i konvertojnë patentë-shoferët, do të gjobiten, ndërsa nuk përjashtohet mundësia që atyre t’u konfiskohen automjetet. E shuma e gjobave, në bazë të ligjit, shkon nga 500 deri në 1 mijë e 500 euro.

Kryeministri i Kosovës, Albin Kurti, nëpërmjet një postimi në “Facebook” para një jave, në prag të përfundimit të afatit, u ka bërë thirrje pjesëtarëve të komunitetit serb t’i përgjigjen në mënyrë pozitive ftesës së autoriteteve për kalim nga patentë-shoferët e lëshuar nga institucionet ilegale të Serbisë në Kosovë, në patentë shoferë legalë të lëshuara nga institucionet e Kosovës.

“Nga 9 maji kur ka filluar ky proces, nuk është shënuar asnjë incident i vetëm. I ftoj të gjithë ata që nuk kanë aplikuar ende për konvertim të patent shoferit që ta shfrytëzojnë këtë mundësi e cila ofrohet në të gjitha komunat deri më datë 9 gusht. Falënderoj qytetarët për bashkëpunimin e vazhdueshëm me institucionet tona”, ka deklaruar kreu i ekzekutivit.

Në këtë kontekst, dokumentet që nevojiten për konvertim të patentë-shoferëve, në bazë të një njoftimi të lëshuar nga MBP-ja në maj, janë letërnjoftimi i Kosovës, origjinali i patentë-shoferit të lëshuar nga autoritetet serbe, certifikata e gjendjes shëndetësore dhe dëshmia e pagesës së taksës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.