Rreth 20 media u sulmuan gjatë tensioneve në Veri – Pse policia s’po angazhohet në mbrojtjen e gazetarëve?
![](https://albanianpost.com/wp-content/uploads/2023/05/cbc167b6-22e0-4037-a497-c30fbc50baa7.jpg)
“Aspak e lehtë” dhe “aspak e zakonshme”.
Këto janë vetëm dy fjalitë me të cilat Anduena Bajqinofci, e nis rrëfimin e saj për raportimin nga Veriu gjatë ditëve të fundit.
Kjo situatë e krijuar kërkoi angazhim pa ndonjë orar të caktuar për gazetarët.
Edhe pse nga çasti në çast mund të sulmoheshin, duke vënë në rrezik jetën e tyre, në asnjë nga ditët ku sulmet po vazhdonin ata nuk e ndalen punën e tyre.
“Kemi qëndruar, gjatë ditës, gjatë mbrëmjeve të vona e orëve të mëngjesit me qëllim që ta pasqyrojmë situatën. Në momente të shpeshta jemi gjendur në një ambient e atmosferë të brishtë të sigurisë, por që nuk na ka ndaluar”.
Për Bajqinofcin, e cila raportoi për mediumin RTV Dukagjinin, të informosh nga kjo pjesë nga vendi i ngjarjes do të thotë “sakrificë”, pasi mbrojtja e gazetarëve nuk sigurohet nga askush.
“Vazhdojmë të raportojmë edhe përtej fyerjeve, ofendimeve, goditjeve me vezë, me gurë e edhe nën të shtëna me armë zjarri. Shqetësuese mbetet fakti që target i protestuesve serbë në rastet e fundit kanë qenë gazetarët më së shumti, automjetet e tyre, pajisjet e tyre, edhe vetë ata”.
Jo vetëm se këtë rrezik e kërkon puna e gazetarisë, por është ndjenja e përgjegjësisë për të informuar opinionin publik në mënyrën e duhur.
![](https://albanianpost.com/wp-content/uploads/2023/06/CE99321E-03B0-4375-BF09-A2DBA4A717A2.jpeg)
“Jemi të rritur për të raportuar në atë pjesë, për ne përtej faktit që është punë, para se gjithash është detyrë që t’i njoftojmë qytetarët në shtëpitë e tyre më shumë për situatën, përveç disa fotografive që mund t’i shohin në rrjete sociale”.
Pra, sulmet e fundit treguan për një ambient që vazhdon të jetë i pasigurt, i papërshtatshëm dhe i brishtë për gazetarët.
Pas gjithë kësaj situate të krijuar, ajo ka vetëm një kërkesë për institucionet.
“Mendoj që është koha e fundit që Qeveria, Ministria e Brendshme të veprojnë. Por, po ashtu të kemi edhe një strategji për mbrojtjen e gazetarëve, pasi në fund të ditës i gjithë qëllimi është informimi i drejtë dhe i saktë”, thotë Bajqinofci për Albanian Post.
“Çdo sulm ndaj gazetarëve, është sulm i lirisë së atij vendi”
Për dallim nga situata e dhjetorit kur ishin vendosur barrikada në Veri për 17 ditë e ku u sulmuan 13 punëtorë të medias, gjendja e ditëve të fundit tregon edhe për një realitet akoma më të ashpër për raportimin e gazetarëve nga Veriu.
Për vetëm katër ditë në këtë pjesë u shënuan 20 sulme ndaj mediave sërish nga persona të maskuar.
Për ekspertin e sigurisë, Avni Islami, sulmet ndaj gazetarëve në Veri tregojnë mjaft shumë për situatën e tensionuar atje.
Sipas Islamit, në një vend ku sulmohen gazetarët, “sulmohet edhe liria ndaj atij vendi”.
“Sulmi ndaj gazetarëve dhe i gazetarisë është sulm ndaj vlerave më sublime, sulm ndaj vlerave të të drejtave të njeriut, sulm kundër fjalës së lirë, kundër raportimeve nga vendi i ngjarjes”.
Situata të tilla tregojnë vetëm për përpjekjet e personave të cilët dëshirojnë të mos flitet realiteti.
“Aty ku sulmohen gazetarët, aty nuk njihet gjuha e lidhjes, por gjuha e anarkisë, gjuha e kriminelëve të cilët nuk duan që gazetaria ta raportoj rastin drejt dhe ashtu siç është. Çdo sulm ndaj gazetarëve, është sulm i lirisë së atij vendi”, thotë Islami për Albanian Post.
Në raportime të tilla ai konsideron që përgjegjës për sigurinë e gazetarëve janë Policia e Kosovës, KFOR-i dhe EULEX-i.
“Është shumë e rëndësishme në Veriun e Kosovës, ruajtja e objekteve komunale mendoj që krahas atyre objekteve duhet t’u sigurojnë gazetarëve raportim të drejt kudo që ata e shohin të nevojshme”.
![](https://albanianpost.com/wp-content/uploads/2023/05/349361139_628821849280612_2927479485436658324_n.jpg)
“Policia e Kosovës dhe të gjitha institucionet e sigurisë qoftë KFOR-i dhe EULEX-i, duhet të ndërmarrin masa në mënyrë që të mos rrezikohet jeta dhe puna e gazetarëve”.
Rreth sulmeve ndaj gazetarëve gjatë ditëve të fundit dhe arrestimeve që janë bërë, Albanian Post ka kontaktuar edhe Policinë e Kosovës, por që deri në publikimin e këtij artikull nuk ka pranuar përgjigje.
Edhe kryetari i Asociacionit të Gazetarëve të Kosovës (AGK), Xhemajl Rexha, në një bisedë për Albanian Post kishte thënë se është e rëndësishme që institucionet të sigurojnë një ambient të përshtatshëm për raportimin e gazetarëve.
“Pra, personat e Qeverisë duhet të bashkëpunojnë me organet e sigurisë me Policinë e Kosovës dhe të jenë në kontakt të vazhdueshëm. Ne si AGK kërkojmë një ambient të sigurt për gazetarët e Kosovës”, tha Rexha për AP.
“Mungesë e aftësisë për t’ua lejuar gazetarëve punën e tyre” – reagimet e organizatave ndërkombëtare të gazetarisë
Shqetësim ndaj këtyre rasteve ka shprehur edhe Federata Ndërkombëtare dhe ajo Evropiane e Gazetarëve (IFJ dhe EFJ).
“Një numër në rritje i sulmeve ndaj gazetarëve dhe punonjësve të mediave janë dokumentuar në veri të Kosovës që nga 26 maji, të cilat u intensifikuan më 29 maj, pas protestave që shpërthyen në rajon”.
“Federatat Ndërkombëtare dhe Evropiane të Gazetarëve (IFJ-EFJ) i bashkohen degës së tyre, Asociacionit të Gazetarëve në Kosovë (AGK), në denoncimin e dhunës që synohet ndaj profesionistëve të medias dhe u bëjnë thirrje autoriteteve kompetente dhe punëdhënësve të mediave që të garantojnë sigurinë e gazetarëve”, thuhet në komunikatën e lëshuar.
Edhe platforma rajonale e Ballkanit Perëndimor – Safe Journalist, përmes një komunikate për media ka thënë se edhe një herë është treguar se ka mungesë të aftësisë për t’i lejuar gazetarët që të kryejnë punën e tyre.
“Ngjarjet e sipërpërmendura përfshijnë raste të agresionit fizik, të ilustruar nga skenari i ekipit të portalit Periskopi, si dhe raste të shkatërrimit dhe vandalizimit të pronave që u përkasin subjekteve profesionale, si TëVë1, Dukagjini, Kallxo dhe Top Channel. Makina e TëVë 1 pasi u vandalizua me gurë dhe bojë i është vënë flaka”.
“Gazetarët sulmohen nga vendasit pasi dallohen përmes mikrofonave, logove në makina, si dhe kur dëgjohen duke folur në shqip. Në Zveçan, gazetarët e mediave shqipfolëse u detyruan të strehohen brenda ndërtesës së Komunës për një orë për të parandaluar sulme të tjera ndaj tyre”.
SafeJournalists që përfaqëson më shumë 8 mijë e 200 profesionistë të medias i ka bërë thirrje pranisë ndërkombëtare në Kosovë, që të ruaj sigurinë dhe stabilitetin në këtë pjesë.
Pse po ndodhin sulmet ndaj gazetarëve në Veri?
Është dita e shtatë me radhë që serbët në Zveçan, Leposaviq dhe Zubin Potok po protestojnë, duke kundërshtuar kryetarët e rinj shqiptarë.
Dy ditët e fundit kanë qenë më të qeta, për dallim nga ditët e tjera ku situata kishte përfunduar me incidente.
Më 26 maj, tensionet në Veri u rritën, atëherë kur krerët e rinj të Zveçanit, Leposaviqit dhe Zubin Potokut, kishin hyrë nën përcjelljen e policisë në ndërtesat komunale.
Ndërkaq, më 29 maj, protestuesit u përleshën me trupat e misionit paqeruajtës të NATO-s në Kosovë, KFOR.
Nga kjo përleshje 41 trupa të KFOR-it, u lënduan edhe dhjetëra protestues.
![](https://albanianpost.com/wp-content/uploads/2023/06/C57BA112-C7A3-4066-BBDC-397AA2200502.jpeg)
Ambasadorët e Shteteve të Bashkuara të Amerikës e Britanisë së Madhe kanë kërkuar që të ndalet menjëherë dhuna ndaj pjesëtarëve të KFOR-it.
Kryetarët e rinj shqiptarë u zgjodhën në zgjedhjet e parakohshme të 23 prillit.
Këto zgjedhje u mbajtën pas dorëheqjes së kryetarëve të mëparshëm komunale nëntorin e 2022.
Kryetarët e mëparshëm vinin nga Lista Serbe partia kryesore e serbëve në Kosovë, e cila nuk mori pjesë në zgjedhje dhe procesi u bojkotua nga serbët lokalë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com