Rregullat historike digjitale të BE-së përballen me sfidën e parë ligjore

Ligji historik i Bashkimit Evropian (BE), i krijuar për të detyruar kompanitë e mëdha të teknologjisë të kontrollojë përmbajtjen në mënyrë më agresive në platformat e tyre, po përballet me sfidën e parë ligjore.

Shitësi më i madh në internet i modës në Evropë ka pretenduar se po shënjestrohetnë mënyrë të padrejtë nga rregullat e reja.

Zalando i Gjermanisë ka paraqitur një ankesë para gjykatës së përgjithshme të BE-së në Luksemburg, duke argumentuar se Komisioni Evropian e kishte etiketuar në mënyrë të padrejtë kompaninë si një “platformë shumë të madhe” sipas Aktit të Shërbimeve Digjitale (DSA) që imponon detyrime shtesë për të trajtuar dezinformimin në internet.

Lëvizja do të monitorohet nga kompanitë e mëdha teknologjike, disa prej të cilave po shqyrtojnë nisjen e sfidave të tyre kundër legjislacionit të krijuar për të frenuar mënyrën se si gjigantët online si Google, Amazon dhe Facebook funksionojnë në Evropë.

“DSA është gjëja e duhur për të bërë, por ne jemi të habitur që u caktuam si një platformë shumë e madhe në internet së bashku me 18 kompani të tjera”, ka thënë Robert Gentz, shefi ekzekutiv dhe bashkëthemeluesi i Zalando.

“Ne jemi e vetmja kompani evropiane në atë listë”, ka shtuar ai.

Akti, i cili hyn në fuqi më 25 gusht, është pjesë e një rishikimi të madh të rregullave digjitale të bllokut.

Ai vendos standarde të reja për policimin e gjuhës së urrejtjes, dezinformatave dhe falsifikimeve në internet, të cilat duhet t’i respektojnë të gjitha platformat e mëdha digjitale.

Në prill, Komisioni Evropian caktoi gjithsej 19 kompani me detyrime të veçanta sipas ligjit, duke përfshirë TikTok dhe Twitter.

Në padi, Zalando ka argumentuar se metodologjia e komisionit për të përfshirë shitësin gjerman me pakicë në listë ishte e gabuar.

“Si marka që jemi, ne nuk duam të lidhemi me këtë kategori. Për këto kompani flitet si aktorë të këqij dhe befas ne jemi në të njëjtën listë. Kjo është e keqe për markën tonë”, ka thënë Gentz.

Kompania gjermane argumenton se, teksa ka më shumë se 83 milionë vizita në faqen e saj të internetit çdo muaj, ka më pak se 31 milionë vizitorë që mund të blejnë produkte nga shitës të palëve të treta.

Dhe kjo është nën 45 milionë të kërkuara nga komisioni për të caktuar një kompani që të jetë brenda fushëveprimit të DSA-së.

“Të gjithë të tjerët u caktuan në bazë të përdoruesve, por ne jemi caktuar në bazë të vizitorëve. Ky është trajtim i pabarabartë”, ka theksuar ai.

Sipas Gentz, Brukseli gjithashtu e keqkuptoi modelin hibrid të kompanisë.

Më shumë se 60 për qind e shitjeve rrjedhin nga produktet e shitura direkt te blerësit online, ndërsa pjesa e mbetur më pak se 40 për qind vjen nga shitës të tjerë përmes faqes Zalando.

Sakaq, DSA kërkon të synojë ndërmjetësues të tillë si Zalando, në mënyrë që rregullatorët të mund të kontrollojnë më mirë sigurinë dhe origjinalitetin e produkteve të shitura në internet.

Marrë nga “Financial Times”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.