Lajme

Rrahim Hashimi ftohet si i dyshuar nga Gjykata Speciale në Hagë


Rrahim Hashimi, ish-ushtari i Ushtrisë Çlirimtare të Kosovës.

Prokuroria e Specializuar i ka dërguar ftesë për intervistim Rrahim Hashimit, ish-ushtarit të Ushtrisë Çlirimtare të Kosovës.

Hashimi në një prononcim për Albanian Post bën të ditur se kjo është hera e dytë që do të intervistohet për periudhën e vitit 1998-1999.

“Vetëm më kanë thirr në telefon dhe më kanë thënë të paraqitem tek zyret e tyre, po ashtu më kanë dërguar mesazh”.

Hashimi shton se, “jam i ftuar në cilësinë e të dyshuarit”.

Ndërsa, bën të ditur se të martën e 9 nëntorit do të paraqitet në zyret e misionit të Bashkimi Evropian për Sundimin e Ligjit EULEX-it në Kosovë, e po ashtu thotë se kësaj ftese do t’i përgjigjet pozitivisht.

“Nuk jam i njoftuar, nëse ka një aktakuzë të ngritur apo jo, por fteses do të ju përgjigjem pozitivisht”.

Më 26 tetor të vitit 2020 në Gjykatën Speciale në Hagë ishte konfirmuar aktakuza ndaj Thaçit, Veselit, Selimit dhe Krasniqit.

Dhomat e specializuara-Hagë

Akuza ndaj tyre në kohë shtrihet midis marsit të vitit 1998 dhe shtatorit të vitit 1999.

Aktakuza pretendon se Hashim Thaçi, Kadri Veseli, Rexhep Selimi, Jakup Krasniqi dhe anëtarë të tjerë të “ndërmarrjes kriminale të përbashkët” kishin qëllimin e përbashkët për të siguruar dhe ushtruar kontroll mbi të gjithë Kosovën përmes metodave që përfshinin frikësimin, keqtrajtimin, ushtrimin e dhunës dhe eliminimin e paligjshëm të atyre që konsideroheshin si kundërshtarë.

Më 25 shtator në Prishtinë janë arrestuar edhe krerët e Organizatës të Veteranëve të Luftës (OVL) të UÇK-së, Hysni Gucati dhe Nasim Haradinaj.

Më 7 tetor, dy udhëheqësit e shoqatës u deklaruan të pafajshëm për akuzat që përfshijnë pengimin e drejtësisë, frikësimin e dëshmitarëve, hakmarrje dhe për shkelje të fshehtësisë së procedurës.

Të dy të pandehurit i thanë kryetarit të trupit, Charles Smith, se ishin të pafajshëm për të gjitha akuzat.

Dhomat e Specializuara dhe Zyra e Prokurorit të Specializuar që ndryshe njihen edhe si Gjykata Speciale hetojnë krimet e supozuara të luftës të ish-pjesëtarëve të Ushtrisë Çlirimtare të Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore