Ecuria pozitive e Romës ndalet pas katër javësh.
Verdhekuqt erdhën në ndeshjen me Veronën me synim që të ngjiteshin përsëri në krye, pas tre fitoreve në tre ndeshjet e para.
Mirëpo, ndeshja në “Bentegodi” ishte histori krejtësisht ndryshe.
Skuadra e Mourinho-s u duk se po shkonte sigurt drejt fitores në pjesën e parë.
Ajo u mbyll me rezultat 0-1 pas golit të Lorenzo Pellegrinit në minutën e 36-të.
Mirëpo, gjithçka ndryshoi në të dytën.
Pa u mbyllur dhjetë minutat e para, Verona shënoi dy herë, me anë të Barak dhe Caprari për epërsinë 2-1.
Shifrat u barazuan në minutën e 58-të pas autogolit të Ilic.
Por, vetëm pesë minuta më vonë, Faraoni shënoi një super gol për rezultatin 3-2.
Përkundër përpjekjeve të shumta, deri në fund nuk ndryshoi asgjë dhe Roma humbi ndeshjen e parë, me Veronën që gjeti pikët e para.
Festë nuk kishte as në anën tjetër të Romës, me Lazio-n që lëshoi pikë si vendas përballë Cagliari-t.
Sikur Roma, edhe Lazio mbylli pjesën e parë në epërsi, falë golit të Ciro Immobile në sekondat mbyllëse të fraksionit hapës.
Mirëpo, në sekondat e para të fraksionit mbyllës, Joao Pedro barazoi për 1-1.
Keita Balde i shënoi ish-skuadrës në minutën e 63-të, për epërsinë e Cagliari-t në “Olimpico”.
Cataldi i shpëtoi një pikë Lazio-s duke barazuar në 2-2 pak para fundit.
Lazio mbetet e shtata me shtatë pikë, derisa Cagliara lë prapa Juventus-in, duke u ngjitur në vendin e 18-të me dy pikë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com