Ambasadori i Gjermanisë në Kosovë, Jorn Rohde, ka thënë se Kosova duhet të bëjë më shumë përpjekje për t’i zbatuar marrëveshjet me Serbinë, derisa ka shtuar se Prishtina po përparon më shumë se vendet e tjera të rajonit drejt integrimit në Bashkimin Evropian.
“Kosova po përparon më shpejt se vendet e tjera të WEB-it, por nevojitet më shumë bashkëpunim mes partive në parlament dhe komuniteteve etnike. Për më tepër, Kosova duhet të bëjë më shumë përpjekje për të zbatuar marrëveshjet e arritura me Serbinë”, ka shkruar ai në platformën X pas takimit me anëtarët e Komisionit për Integrim Evropian.
Ndërsa Shefi i Zyrës së Bashkimit Evropian në Kosovë, Tomas Szunyog, ka potencuar se BE-ja është e gatshme të ndihmojë Kosovën në përmirësimin e situatës ekonomike.
Ai ka shtuar se ky është raporti i fundit para hyrjes në fuqi të liberalizimit të vizave me 1 janar, ku sipas tij është një arritje e madhe nga autoritet e Kosovës, por edhe nga BE.
“Jam takuar me anëtarët e Komisionit për Integrime Evropiane për të diskutuar me ta për pakon e zgjerimit të vitit 2023 dhe i kam informuar në thellësi se çfarë ka në veçanti në dokument. Kosova gjithashtu duhet të jetë e gatshme ta përdorë këtë raport për të përparuar në rrugën drejt Bashkimit Evropian”, tha ai.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
