Rohde kërkoi 4 muaj, Kurti: Fushata informuese për dinarin po jep rezultatet e saj  

Ndonëse ambasadori i Gjermanisë në Kosovë, Jorn Rohde, kërkoi të premten që afati i tranzicionit për dinarin të jetë për një periudhë katër mujore, kryeministri i Kosovës, Albin Kurti, të shtunën ka potencuar se fushata informuese dhe komunikese e Qeverisë së Kosovës ka filluar të jap frytet e saj.

Meqë sipas tij, kanë mbetur fare pak serbë të cilën mund të mos din se për çfarë po bëhet fjalë.

“E kemi në periudhë tranzitore në kuptimin që nuk dëshirojmë të ndëshkojmë ata të cilët kanë ende dinarë. Fushata unë besoj po jep rezultatet e saj, besoj se ka ngelur fare pak serbë që mund mos e din se për çfarë bëhet fjalë”, tha ai në një prononcim për media.

Qeveria e Kosovës, sipas Kurtit, ka intensifikuar fushatën informuese e komunikuese me të gjitha ata të cilët e kanë kuptuar ose edhe kanë nevojë ta ri-dëgjojnë që dinari në Kosovë nuk po ndalohet.

“Mirëpo dinari nuk lejohet si mjet pagese, Kosova e ka euron. Alarmimi që vjen me idenë e përhapjes së panikut vjen nga Beogradi, ajo çfarë bëjmë ne është informimi i drejtë”.

Një vendim i Bankës Qendrore të Kosovës së fundmi ka shkaktuar fërkimin politik të radhës në mes të Qeverisë së Kosovës – e cila në emër të ligjit po tenton ta shtrijë sovranitetin në Veri të Kosovës – dhe komunitetit ndërkombëtar – i cili s’po do “surpriza” në terren, por zbatim të marrëveshjeve (Asociacionin).

Vendimi i BQK-së që në Kosovë të përdoret vetëm një valutë, euro, aktualisht ka ngecur në mes thirrjes së komunitetit ndërkombëtar që i njëjti të shtyhet deri në një afat më optimal, pasi shteti serb tha se vendimi i Kosovës afekton serbët e Kosovës, meqë ata i pranojnë të gjitha ndihmat nga Serbia në dinarë dhe në anën tjetër arsyetimin e autoriteteve kosovare se vendimi një fjalë është vetëm zbatim i një dispozite të Kushtetutës së Kosovës dhe asgjë tjetër.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.