RLI: Serbia synon ta destabilizojë Kosovën përmes orkestrimit të zhvendosjes së serbëve nga veriu

Presidenti i Serbisë, Aleksandër Vuçiç, mund të jetë duke orkestruar një plan që përfshin zhvendosjen e serbëve të Kosovës në Serbi, ka shkruar instituti amerikan për studime të sigurisë “Robert Lansing Institute (RLI)” në një analizë kushtuar zhvillimeve të fundit, derisa ka përmendur edhe vizitën e shefit të Agjencisë Qendrore të Intelegjencës (CIA), William Burns, në rajon.

“Qëllimi i kësaj vizite ka qenë adresimi i çështjeve kritike me të cilat do të përballet rajoni në muajt e ardhshëm. Kjo vizitë është konsideruar si vizita më e rëndësishme në rajon në pesëmbëdhjetë vitet e fundit dhe synonte të vizatonte ‘vijat e kuqe’ për lidershipin politik”, ka shkruar fillimisht RLI.

RLI, duke komentuar rreth “skenarit të zhvendosjes” së serbëve nga pjesa veriore e Kosovës, ashtu sikurse kanë paralajmëruar dy figura të njohura publike nga Serbia – Sonja Biserko dhe Nenad Çanak – ka vlerësuar se Vuçiç synon të fabrikojë pretekstin për eksodin e serbëve nga veriu i Kosovës.

“Vuçiç mund të sajojë njëfarë justifikimi për të akuzuar Kosovën për spastrim etnik kundër serbëve, diçka që mund të çojë në një situatë shqetësuese humanitare dhe pasoja të rënda për Kosovën në skenën ndërkombëtare. Çdo shkëmbim i popullsisë është në thelb i rrezikshëm dhe mund të shkaktojë konflikte më të mëdha në të ardhmen”, ka argumentuar ndër të tjera RLI.

Ndryshe, ditëve të fundit kanë qarkullar “informacione” se Serbia është duke planifikuar zhvendosjen e serbëve të Kosovës, posaçërisht atyre që përbëjnë shumicën në veri, në rajonin e Sanxhakut. Një numër vëzhguesish kanë argumentuar së fundi se Qeveria e Kosovës rrezikon të bjerë në “grackën” e Serbisë dhe Rusisë për shkak të “veprimeve të pakoordinuara” në veri.

Joseph: Serbët janë afër heqjes dorë nga jeta në Kosovë – rezultat që i konvenon Serbisë e Rusisë për të minuar rendin perëndimor

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.