Rizvanolli: Mbi 2 mijë aplikime kemi pranuar për subvencionim të pajisjeve

Ministrja e Ekonomisë, Artane Rizvanolli, ka thënë se akoma pa u bërë një muaj në këtë dikaster janë pranuar mbi 2 mijë aplikime për subvencionim të pajisjeve.

Përmes një shkrimi në rrjetin social ‘Facebook’, Rizvanolli ka thënë se aplikimet vazhdojnë të jetë të hapura.

“Ende pa u bërë një muaj kemi pranuar 2781 aplikime për subvencionim të pajisjeve. Aplikimet vazhdojnë të jenë të hapura”, ka shkruar ajo.

Teksa ka ripërsëritur mënyrën se si mund të informohen qytetarët për subvencionim.

“Për t’u informuar më shumë rreth subvecnionit, vizitoni: https://shorturl.at/clnQ9”.

“Linku për aplikim për subvencionim të pajisjeve efiçente shtëpiake: https://ekosova.rks-gov.net/467”.

“Linku për aplikim për subvencionim të sistemit diellor për ngrohje të ujit sanitar: https://ekosova.rks-gov.net/468”.

Kryeministri i Kosovës, Albin Kurti, kishte bërë të ditur se Qeveria e Kosovës përmes Ministrisë së Ekonomisë gjatë vitit të fundit ka subvencionuar afro 10 mijë familje për të blerë pajisje efiçiente për ngrohje, ndërsa këtë vit ka dyfishuar buxhetin, me mbështetje të Bashkimit Evropian, në këtë fushë.

Rreth dy javë më parë Ministria e Ekonomisë ka bërë lansimin e mbështetjes së konsumatorëve familjarë në investimin në pajisje shtëpiake efiçiente dhe sistemin diellor për ngrohjen e ujit sanitar.

Edhe ministri i Financave, Punës dhe Transfereve, Hekuran Murati, ka thënë se mbi 16 mijë familje kanë aplikuar për subvencionimin e faturave të energjisë elektrike.

Lajmin e ka bërë të ditur Murati po ashtu të martën përmes një shkrimi në rrjetin social ‘Facebook’.

“Mbi 16 mijë familje kanë aplikuar deri më tani për subvencionim të faturave të energjisë elektrike. Aplikimi do të jetë i hapur deri në fund të muajit shtator, dhe mund të bëhet online në formularin: https://see.rks-gov.net”, ka shkruar ai.

Teksa u ka bërë thirrje familjeve që kanë të ardhura mesatare mujore më pak se 150 euro që të aplikojnë.

Po ashtu Bashkimi Evropian (BE), kishte mirëpritur vendimin e Qeverisë së Kosovës për subvencionimin e faturës së energjisë elektrike për konsumatorët që konsiderohen të cenueshëm siç janë personat me aftësi të kufizuara, nënat vetushqyese dhe pensionistët që jetojnë vetëm.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.