Pas numërimit të votave në shtatë vendvotime, një në zonën zgjedhore 6 dhe gjashtë në zonën zgjedhore 5, “Fronti Evropian” është tkurrur me një deputet, ndërsa koalicioni “VLEN” është rritur për një.
Rezultati tani ka ndryshuar, diferenca është zvogëluar. “Fronti Evropian” ka tani 18 deputetë – njëjtë sa ka partia maqedonase LSDM – ndërsa “VLEN” 14, duke e ngushtuar kështu diferencën nga 6 në 4 deputetë, pasi që para këtyre rivotimeve rezultati ishte 19 me 13.
Në njësinë zgjedhore 5 “Fronti Evropian” ka arritur që ta ruajë deputetin e katërt, që kishte rrezik që t’i kalonte LSDM-së, ndërsa në zonën zgjedhore 6, “VLEN” ia ka marrë një deputet Frontit.
Adnan Azizi nga Lëvizja BESA – pjesë e koalicionit “VLEN” – ka siguruar ulëse në Kuvendin e Maqedonisë së Veriut, duke e zëvendësuar kështu Fatmire Isakin e Partisë Demokratike Shqiptare – pjesë e “Frontit Evropian”.
Me këtë përmbysje të “VLEN”-it në zonën 6, numri i mandateve në këtë zonë – që prodhon më së shumti deputetë shqiptarë – me numër deputetësh është i barabartë mes Frontit dhe koalicionit opozitar shqiptar: 8 me 8, ndonëse se me numër votash Fronti prinë.
Rivotimi të mërkurën është zhvilluar në vendvotimet në Zhelinë, në Krushevë, në Ohër, në Dollnen dhe në Strugë.
Të drejtë vote në këto qendra votimi kanë pasur gjithsej 4 mijë e 521 votues.
Këto rivotime janë bërë pasi që ka pasur dyshime për keqpërdorime gjatë procesit zgjedhor.
Mirëpo, sipas “Frontit Evropian”, që udhëhiqet nga Ali Ahmeti, këto janë bërë në mënyrë që atyre t’u merren dy deputetë, pasi që në zgjedhjet e 8 majit ky Front mori 19 deputetë, duke u renditur i dyti në nivel republikan.
Në zgjedhjet parlamentare në Maqedoni të Veriut, sa i përket kampit shqiptar, fitues me mbi 30 mijë vota doli “Fronti Evropian”, i cili, pas rivotimit të së mërkurës, numëron 18 deputetë, apo 4 më shumë seç fitoi koalicioni i partive opozitare shqiptare “VLEN”, të cilët morën 14 ulëse në kuvend.
Ndërsa, te kampi maqedonas, fitues absolut është partia nacionaliste VMRO-DPMNE, e cila siguroi plotë 58 ulëse në parlamentin e Maqedonisë së Veriut nga 120 sa i ka gjithsejtë, derisa LSDM-ja, partia që deri më tani kishte pushtetin mori vetëm 18 deputetë – rezultatin më të dobët në histori të saj.
Ulëse në kuvendin maqedonas kanë fituar edhe dy parti të tjera maqedonase. Nga 5 sosh i kanë marrë e majta ekstrem “Levica”, dhe Lëvizja “ZNAM”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
