![](https://albanianpost.com/wp-content/uploads/2021/11/257931412_195158806029844_2622431109536784823_n-1333x1000-1.jpg)
Ministër i ri i Shëndetësisë në Kosovë, do të jetë Rifat Latifi.
Emërimin e tij e ka bërë të ditur vetë Kryeministri i Kosovës, Albin Kurti, në një konferencë për media.
“Unë si kryeministër sapo kam nënshkruar vendimin për ministrin e ri të shëndetësisë, i cili do të jetë Profesor Doktor Rifat Latifi, që erdhi nga New York në Prishtinë”, është shprehur Kurti, teksa ka treguar edhe për profesionalizmin e Latifit.
Rifat Latifi në konferencën e tij të parë si Ministër i sapo emëruar i shëndetësisë, ka premtuar se ai vetë dhe ekipi i tij do të angazhohen në ngritjen e standardeve mjekësore duke e ngritur edukimin dhe trajnimin e të gjithë punëtorëve shëndetësor.
Sipas tij, me ngritjen e kapaciteteve njerëzore investohet në ngritjen e kualitetit të shërbimeve dhe në këtë mënyrë shtohet volumi i shërbimeve mjekësore në Kosovë.
“Me ngritjen e kapaciteteve njerëzore si dhe kthimin e trurit të larguar tash e 20 vjet nga Kosova, do të parandalohet largimi i pacientëve tanë për në vendet në rajon dhe kështu këtë investim shtetëror dhe individual në spitalet e huaja i kthejmë në shtëpinë tonë dhe modernizojmë spitalet tona”, ka thënë Latifi.
![](https://albanianpost.com/wp-content/uploads/2021/11/257583213_213378830933818_2942611886661100676_n-1024x576.jpg)
“Rezultate nuk do të shihen brenda ditës”, tha Latifi duke shtuar se “duhet investim dhe përkrahje shtetërore legjislative, përkrahje kolektive dhe individuale për të realizuar gjithë këtë strategji afatgjate e transformimit të shëndetësisë”.
Ministri i ri i Shëndetësisë Rifat Latifi, që erdhi nga SHBA-ja, ka ripërsëritur disa herë që synon që ta kthejë ‘trurin shkencor’ të larguar nga Kosova duke nënkuptuar kthimin e mjekëve dhe profesionistëve të tjerë shëndetësorë në vend.
“[Kthimi i trurit mjekësor] tash për tash është koncept në mendjen time detajet e të cilave do t’i njihni derisa ne i përcaktojmë saktësisht”.
“Fakti se unë kam ardhur këtu nga një rehati në jetën amerikane dhe një pune shumë të mirë është sinjal i fuqishëm që edhe të tjerët të na bashkangjiten në kthimin në Kosovë”.
“Kur e kemi pasë kongresin e parë të kirurgëve të Kosovës kemi pasë më shumë se 10 kirurgë eminentë të botës që janë nga Kosova dhe që janë gati me u kthy dhe të kontribuojnë në edukim. Duhet të jemi të hapur dhe të krijojmë strategji se si t’i angazhojmë të gjithë ata që duan të vijnë”.
Ndryshe, Ministria e Shëndetësisë tash e disa javë ka ushtruese detyre gjegjësisht Dafina Gexha-Bunjakun, pasi ish-ministri, Arben Vitia u tërhoq nga kjo dikaster për të kandiduar për kryetar të Komunës së Prishtinës në zgjedhjet lokale të 17 tetor.
Latifi është shef i Kirurgjisë së Përgjithshme në Qendrën Mjekësore Westchester në New York, profesor në Universitetin e Arizonës, anëtar i Kolegjit Amerikan të Kirurgëve dhe Kolegjit Ndërkombëtar të Kirurgëve, kryetar themelues i Kolegjit të Kirurgëve të Kosovës, që nga dhjetori i vitit 2018.
Në vitin 2009, Latifi ishte emëruar këshilltar për shëndetësi nga kryeministri i atëhershëm Hashim Thaçi.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com