Riadi planifikon të ftojë Assadin në samitin arab

Arabia Saudite planifikon të ftojë presidentin sirian Bashar al-Assad në një samit të Ligës Arabe që Riadi do të presë në maj, thanë për agjencinë e lajmeve “Reuters” tre burime të njohura me këtë çështje, një veprim që do t’i jepte fund zyrtarisht izolimit rajonal të Sirisë.

Ministri i Jashtëm saudit, Princi Faisal bin Farhane do të udhëtojë në Damask në javët e ardhshme për t’i dhënë një ftesë zyrtare Asadit për të marrë pjesë në samitin e planifikuar për më 19 maj, thanë dy nga burimet.

Gjithashtu, ministri i Jashtëm sirian Faisal Mekdad u prit të shtunën në Kajro nga homologu i tij egjiptian Sameh Shukri me rastin e vizitës së parë zyrtare në Egjipt nga një shef i diplomacisë siriane që nga fillimi i luftës civile në Siri në vitin 2011.

Kjo vizitë, tha një burim brenda shërbimeve egjiptiane të sigurisë, duke folur në kushte anonimiteti, kishte për qëllim krijimin e kushteve për riintegrimin e Sirisë në Ligën Arabe falë ndërmjetësimit të Egjiptit dhe Arabisë Saudite.

Siria ishte përjashtuar përkohësisht nga Liga Arabe në nëntor 2011, përballë shtypjes së përgjakshme të demonstratave për demokracinë që kishin filluar tetë muaj më parë.

Fuqitë rajonale, si Arabia Saudite apo Emiratet e Bashkuara Arabe, kohët e fundit kanë bërë gjeste hapjeje ndaj Damaskut.

Shtetet e Bashkuara shprehën keqardhje për këto përpjekje që synojnë rehabilitimin e Bashar al-Assad ose normalizimin e lidhjeve me Sirinë, për sa kohë që konflikti nuk i gjendet një zgjidhje politike.

Agjencia zyrtare siriane e lajmeve “SANA” raportoi se bisedimet midis Sameh Shukri dhe Faisal Mekdad do të fokusohen në forcimin e marrëdhënieve midis Damaskut dhe Kajros. Ministri i Jashtëm egjiptian vizitoi Sirinë dhe Turqinë shkurtin e kaluar pas tërmeteve që shkatërruan rajonin.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.