Rhode dhe Guerot: Masat s’i kemi marrë me qejf – më mirë do ishte të flisnim për Ligën e Kampionëve

Ambasadori i Gjermanisë në Kosovë, Jorn Rhode dhe ai i Francës, Olivier Guerot, në një intervistë të përbashkët për televizionin “Klan Kosova”, kanë thënë se “masat ndëshkuese” ndaj Kosovës, nuk i kanë marrë me qejf, porse mos-gatishmëria e kryeministrit Albin Kurti për t’i dëgjuar kërkesat e tyre për shtensionimin e situatës në veri.

“Ju e dini që Bashkimi Evropian kërkoi nga Kosova dhe Serbia më 3 qershor disa hapa për shtensionim dhe nëse këta hapa nuk ndërmerren, do të kenë pasoja negative dhe këto pasoja negative tashmë janë prezantuar gjithashtu në baza bilaterale, pjesërisht nga Gjermania, dhe për shkak se kërkesat nuk janë plotësuar”, ka thënë Rhode.

“Dua të theksoj se këto masa nuk janë marrë me kënaqësi, nuk është diçka që jemi të lumtur ta bëjmë. Kosova është një shtet miqësor për Francën, Gjermaninë dhe tërë BE-në dhe nuk i kemi marrë me qejf këto masa, këto masa janë të kthyeshme dhe mezi po presim të kemi mundësi t’i largojmë”, ka thënë Guerot.

Ambasadori Rhode madje ka thënë se me më shumë kënaqësi do të fliste për kampionatin evropian të futbollit sese për vargun e “masave ndëshkuese” apo “masave negative”, ndërsa ka bërë thirrje sërish që kërkesave të bashkësisë së organizuar t’i përgjigjet pozitivisht kryeministri Kurti.

“Unë kurrë nuk do ta kisha imagjinuar që të ulem këtu dhe të flas për masa negative, jam ulur këtu dhe po mendoj se si më me qejf do të kisha folur për Ligën e Kampionëve apo gjermano-kosovarët që kanë përparuar, por mesazhi ynë është: dëgjoni miqtë tuaj, nga 3 qershori nuk e kemi pranuar përgjigjen”, tha ai.

Plani i BE-së parasheh tërheqjen e njësive elitare të Policisë së Kosovës nga afërsia e ndërtesave komunale në veri – paralelisht me tërheqjen e protestuesve serb – tërheqjen e kryetarëve të rinj shqiptarë nga ndërtesat komunale, shpalljen e zgjedhjeve dhe garancën e serbëve lokalë se do të marrin pjesë në zgjedhje.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.