Rezart Taçi dhe historiku dekadent i proceseve ndaj tij

Biznesmeni shqiptar, Rezart Taçi, ndaj të cilit Prokuroria e Posaçme (SPAK) mëngjesin e 12 nëntorit 2021 ka lëshuar tre urdhërarreste për tre persona, të cilët dyshohen se janë marrë me pastrim parash, ka jo pak çështje të dërguara në Gjykatë gjatë viteve, kryesisht për mospagim taksash.

Në vitin 2008, Taçi do të merrte nën kontroll 85% të aksioneve të ARMO-s nëpërmjet kompanisë AMRA Oil për 128 milionë euro.

AMRA ishte regjistruar në Zvicër dhe në SHBA. Asokohe, ai mori një kredi nga Banka Ndërkombëtare e Azerbajxhanit.

Më 9 gusht 2012, Gjykata e Tiranës vendosi sekuestro ndaj kompanive të Rezart Taçit, për shkak të një borxhi 75 milionë euro marrë për blerjen e kompanisë ARMO nga Azerbajxhani.

Abuzimet e pretenduara me ARMO-n u nxorën në dritë vitin 2014, pas një auditi nga kompania azere, e cila bleu paketën e aksioneve të AMRA Oil për 50 milionë euro në qershor të vitit 2013, disa javë para zgjedhjeve parlamentare në Shqipëri.

Në kohën kur menaxhohej nga biznesmeni Rezart Taçi dhe azerbajxhanasit, ARMO nuk pagoi disa herë pagat e 1500 punëtorëve për vitet 2015 dhe 2016.

Problemet e rafinerisë kanë filluar pas privatizimit nga biznesmeni i hidrokarbureve, Rezart Taçi.

Mediat, më 9 maj 2016, pasqyruan arrestimin në Zvicër të ish-manjatit të naftës, Rezart Taçi. Sipas tyre, ai u akuzua për “Mashtrim”, “Falsifikim të dokumenteve” dhe “Falsifikimi i vulave dhe i stampave ose i formularëve”.

Ky hetim nisi pas kallëzimit të dy kompanive, një e regjistruar në shtetin panamez, me emrin “Wallis Trading INC”, dhe ajo holandeze “Trafigura Beheer Bv”. Dy kompanitë, kishin një marrëveshje tregtare të nënshkruar që në vitin 2009, me kompaninë e Rezart Taçit.

Një çështje tjetër ndaj Rezart Taçit, regjistruar në vitin 2009, është ajo e 2 nëntorit të vitit 2009, kur ai, së bashku me dy truprojat e tij, u përfshi në konflikt me gazetarin Mero Baze.

Për këtë, biznesmeni qëndroi në qeli për dy javë.

Më 24 janar të 2018-s, Taçi u akuzua nga Prokuroria e Tiranës për mospagim taksash dhe tatime, pra për shmangie të pagesës së TVSH-së, akcizës dhe taksën e karbonit, gjatë kohës që ka pasur nën administrim kompaninë ARMO.

Nëntor 2021

Disa ditë më parë, Policia i sekuestroi 1.3 milionë dollarë në llogarinë bankare të tij.

Lidhur me këtë lajm, i pyetur nga Albanian Post, Taçi është shprehur se çështja e Zvicrës ka qenë mosmarrëveshje civile me dy-tre kompani.

“Ajo çështje ka qenë në hetim dhe ka mbetur në hetim nuk ka proceduar as në Gjykatë. Është mbyllur te hetimi dhe nuk është hedhur në gjykim. Nuk kam asnjë precedent penal dhe nuk jam i dënuar asnjëherë”, u shpreh ai.

Pavarsisht historikut dekadent të proceseve ndaj tij, Taçi nuk është i dënuar në Shqipëri me një vendim të formës së prerë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.