Revokohet licenca e shtëpisë së të moshuarve “Orenda”

Licenca e shtëpisë së të moshuarve “Orenda” në Pejë është revokuar.

Kjo pas publikimit të një video në të cilën infermierët ushtronin dhunë ndaj një të moshuare.

Lajmin e ka bërë të ditur Ministria e Financave, Punës dhe Transfereve.

“Pas publikimit të pamjeve të sulmit fizik ndaj të moshuarës në subjektin “Orenda” në Pejë, Njësia e Inspektimit të Shërbimeve Sociale ka bërë inspektimin e menjëherëshëm të vendit të ngjarjes, si dhe intervistimin e stafit të qendrës dhe dëshmitarëve të rastit”.

“Me përmbylljen e raportit të inspektimit, i njëjti i është dorëzuar sot Komisionit Licencues, i cili ka mbajtur një takim urgjent ku është marrë vendim që subjektit “Orenda” t’i revokohet licenca për ofrimin e shërbimeve sociale”, thuhet në njoftim.

Tri infermiereve të dyshuara për sulmin fizik ndaj të moshuarës në shtëpinë e pleqve në Pejë, iu është caktuar masa e paraburgimit prej një muaji.

Nga ministria është sqaruar se duke u bazuar në vendim “Orenda” është e obliguar që për 24 orë t’i njoftojë familjarët e rezidentëve e nga 7 nëntori ta dorëzojë licencën dhe ta mbyllë aktivitetin e ofrimit të shërbimeve sociale.

Çfarë ndodhi në Pejë?

“Kuku”, bërtet një e moshuar e cila është zënë peng nga një vajzë – që nga veshja duket se është punonjëse e institucionit për të moshuar.

Por britmat janë krejtësisht të kota sepse e reja pamëshirshëm vazhdon ta godas.

“Çka po sillka more”, thotë një tjetër vajzë që xhironte dhunën që po ushtrohej brutalisht.

Me shumë gjasë, ngjarja ndodhte brenda ambientit të Shtëpisë për të Moshuar në këtë qytet.

Në videon e publikuar vajza s’pushon së godituri, derisa e moshuara dëshpërimisht kërkon t’i ikën.

“Pak jom t’u ia hi, qysh di me sill unë, pak jom t’u ia hi”, inkurajohet dhunuesja tashmë e arrestuar nga policia e Kosovës për sulm fizik.

Foto nga sulmi ndaj të moshuarës në Shtëpinë e Pleqve “Orenda” në Pejë.

Derisa ajo godet e të tjerat i buzëqeshin aktit barbarë, njëra prej tyre thotë me buzëqeshje se po e xhirojnë rastin “për media”.

Në anën tjetër, sulmuesja vazhdon pos shuplakave që nuk ndalen edhe t’i kërkojë llogari të moshuarës.

“Ti po do m’u shty me mua a, ti?”, thotë ajo.

Kur i duket se nuk mjaftojnë goditjet me dorë, ajo mbështet për muri viktimën dhe sulmon me këmbë.

E godet me gju në barkë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.